Trump yavuze ko Amerika yatangije ibitero 'bikomeye kandi byica' muri Nigeria

Perezida Donald Trump wa Amerika yatangaje ko iki gihugu cyatangiye "ibitero bikomeye kandi byica" ku mutwe wa Islamic State (IS) mu majyaruguru ashyira uburengerazuba bwa Nigeria.

Trump yasobanuye IS nk' "icyago cy'iterabwoba" ashinja uyu mutwe "kwibasira no kwica nabi, by'umwihariko, inzirakarengane z'Abakristu".

Mu mezi ashize Trump yari yatangaje ko Abakristu muri Nigeria bari mu kaga. Yavuze ko "ibihumbi" byabo bishwe, ariko ntiyagaragaza gihamya.

Yatangaje ko igisirikare cya Amerika "cyakoze ibitero byiza byinshi", mu gihe nyuma ibiro by'ingabo za Amerika ziri muri Afurika US Africa Command (Africom) byatangaje ko ibitero byo mu kirere byo ku wa kane byagabwe ku bufatanye na Nigeria na leta ya Sokoto y'iki gihugu.

Minisitiri w'ububanyi n'amahanga wa Nigeria Yusuf Maitama Tuggar yabwiye BBC ko "cyari igikorwa gihuriweho" kigambiriye "abaterabwoba" kandi ko "ntaho gihuriye n'idini runaka".

Atavuze by'umwihariko IS, Tuggar yavuze ko ibi bitero "byafashe igihe runaka" kubitegura kandi byifashishije amakuru y'ubutasi yatanzwe na Nigeria.

Tuggar ntiyakuyeho ko ibi bitero bishobora gukomeza, avuga ko bizaterwa "n'ibyemezo bizafatwa n'ubutegetsi bw'ibihugu byombi".

Hagati aho minisitiri w'ingabo za Amerika Pete Hegseth ku wa kane yanditse ku rubuga X ko yishimira ubufatanye bwa leta ya Nigeria muri ibi bikorwa, yongeraho ati: "Noheli nziza".

Nyuma minisiteri y'ingabo za Amerika yatangaje amashusho agaragaza misile ihagurutse ku bwato bwa gisirikare.

Kuri uyu wa gatanu mu gitondo, minisiteri y'ububanyi n'amahanga ya Nigeria yatangaje ko iki gihugu "gishimitse ku bufatanye mu by'umutekano n'abafatanyabikorwa mpuzamahanga, harimo Leta Zunze Ubumwe za Amerika, mu gukemura ikibazo cy'iterabwoba n'ubuhezanguni burimo urugomo."

Mu byo yatangaje ku rubuga Truth Social ku wa kane, Trump yagize ati: "ku butegetsi bwanjye, igihugu cyacu ntabwo kizemera ko Iterabwoba ry'Imitwe [yiyitirira] ya Kisilamu rizakomera".

Mu kwezi gushize kw'Ugushyingo (11), Trump yavuze ko igisirikare cya Amerika kirimo kwitegura igikorwa muri Nigeria cyo kurwanya imitwe y'iterabwoba.

Mu mezi ashize ubutegetsi bwa Trump bwagiye buvuga ko hari jenoside irimo gukorerwa abakristu muri Nigeria.

Ibigo bikurikirana ibikorwa by'ubugizi bwa nabi bivuga ko nta bimenyetso byemerekana ko Abakristu bicwa kurusha Abayisilamu muri Nigeria.

Umujyanama wa Perezida Tinubu aheruka kubwira BBC ko abicanyi bakora iterabwoba muri icyo gihugu batibasira abayoboke b'ukwemera runaka ko bica abo mu madini yose, n'abatari mu madini.

Imitwe y'abahezanguni nka Boko Haram na Islamic State Intara ya Afurika y'Iburengerazuba yakomeje guca ibintu muri Nigeria mu myaka irenga icumi ishize.

Iyi mitwe yishe abantu ibihumbi – gusa abishwe benshi ni Abayisilamu nk'uko bivugwa n'ikigo Acled gisesengura ibikorwa by'urugomo n'amakimbirane ku isi.

Mu gice cyo hagati muri Nigeria hakunze kuba imirwano hagati y'amatsinda y'aborozi b'Abayisilamu n'amatsinda y'abahinzi akenshi b'Abakristu, bapfa amazi n'inzuri.

Ibitero byo kwica no kwihorera bihoraho byaguyemo abantu ibihumbi – ariko ubwicanyi bwakozwe n'impande zose.