Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
M23 'irimo gushinga ubutegetsi bwigenga' – Raporo 'nshya' y'inzobere za ONU
Inzobere za ONU zasohoye raporo y'ibanze ivuga ko "umutwe wa M23 ufashijwe n'u Rwanda" urimo gushinga ubutegetsi bwigenga mu burasirazuba bwa Congo nubwo rwose hari ibiganiro n'imihate y'amahoro ya Doha na Washington.
Umutwe wa M23 nta cyo uratangaza kuri iyo raporo yo ku wa 30 Ukuboza(12), gusa mbere watangaje ko nta mugambi ufite wo gushinga leta yigenga cyangwa gucamo Congo kabiri.
Iyi raporo ivuga ko ibintu byarushijeho kumera nabi mu mezi ashize kuko impande zihanganye - Kinshasa na M23, zagiye zigabanaho ibitero mu buryo "bunyuranyije n'ubwumvikane bwo guhagarika imirwano" bwari bwagiye bugerwaho.
Iyi raporo ivuga ko AFC/M23 ishaka "kuba ubundi butegetsi bubangikanye n'ubwa leta ya Congo, ishyiraho inzego z'ubutegetsi, iz'ubucamanza, iz'imisoro, n'inzego z'umutekano bisa nko kurema ibikorwa bya leta".
Iyi raporo ivuga ko AFC/M23 yaguye ibikorwa byayo bya gisirikare muri Kivu ya Ruguru na Kivu y'Epfo ibifashijwemo n'igisirikare cy'u Rwanda (RDF) "kiyobora ibikorwa, kigafatanya mu bitero, hamwe no gutegura ibitero bizakorwa nyuma".
Nubwo abategetsi ba DR Congo biyemeje gukemura ikibazo cya FDLR, umutwe urwanya ubutegetsi bw'u Rwanda, iyi raporo y'inzobere za ONU ivuga ko igisirikare cya Congo (FARDC) mu bikorwa byacyo "gikomeje kugendera ku bufasha bwa FDLR n'imitwe ikorana na FDLR".
Leta ya Kinshasa ntacyo iravuga kuri iyi raporo y'inzobere za ONU.
Inzobere za ONU zivuga ko ibintu byarushijeho kumera nabi mu burasirazuba bwa Congo, mu gihe kandi ubu bivugwa ko umuhate wo kugera ku mahoro mu biganiro bya Doha utarimo gukomeza.
Avuga kuri iyi raporo, ku rubuga rwa X, Minisitiri w'ububanyi n'amahanga w'u Rwanda, Olivier Nduhugnirehe, yafatiye ku ngingo z'iyi raporo zivuga ku bitero bikorwa na M23 birimo ibikorwa ku mutwe wa FDLR, maze anenga ko izo nzobere za ONU zibogamiye kuri FDLR.
Ingingo ya 43 y'iyo raporo ivuga ko ibitero [bya M23] bigambiriye umutwe wihariye – FDLR n'abasivile bari kumwe na wo, by'ibanze b'aba Hutu – bishobora kugira ibyaha by'intambara n'ibyaha byibasiye inyoko muntu.
Nduhungirehe yavuze ko mu gihe hari imvugo z'urwango ku banyecongo b'Abatutsi "zivugwa n'abategetsi" kuri televiziyo y'igihugu, n'ibitero by'indege ku basivile, izo nzobere za ONU zafashe uruhande rwa FDLR – umutwe amasezerano ya Washington avuga ko ugomba gusenywa.
Muyaya yavuze ku 'guhagarara' kw'ibiganiro bya Doha
'U Rwanda na M23 bagomba gusubira inyuma kugira ngo ibiganiro bya Doha bitange umusaruro witezwe' - Muyaya
Minisitiri w'itumanaho akaba n'umuvugizi wa leta ya DR Congo yatangaje ko batazakomeza ibiganiro na AFC/M23 i Doha niba uwo mutwe udasubiye inyuma "ku mirongo wahozeho".
Minisitiri Patrick Muyaya yatangaje ibyo mu kiganiro na Radio Okapi iterwa inkunga na ONU, nyuma y'amakuru amaze iminsi avuga ko leta ya Kinshasa yivanye mu biganiro bya Doha bigamije kugera ku mahoro hagati y'impande zombi.
Muyaya yavuze ko Kinshasa itivanye muri ibyo biganiro, ko ayo makuru ari "fake news" kandi ari "ibihuha bikwizwa na M23 n'u Rwanda", ko bo ahubwo bakomeje kuganira n'umuhuza - leta ya Qatar.
Minisitiri Muyaya yavuze ko mu mezi ashize mu ibiganiro bya Doha hatewe intambwe zirimo kumvikana ku "ku buryo bwo guhagarika imirwano n'uko bizakorwa" ndetse bagira ibyo bumvikana "no ku kibazo cy'imfungwa".
Yongeraho ko izo ntambwe zose "u Rwanda na M23 bazirenzeho" ntibazubahirize.
Ati: "Ni gute wakumva ko tuzamererwa neza kugenda tukicarana n'abantu batubahiriza ibyo twumvikanye kuva ku ntangiriro n'iyo twaba twateye intambwe?"
Leta y'u Rwanda ihakana gufasha umutwe wa M23, ivuga ko yafashe gusa ingamba zo kwirinda, na ho umutwe wa M23 ushinja leta ya Kinshasa na FARDC ko ari bo barenga ku byo bumvikanaho mu biganiro bakagaba ibitero ku birindiro bya M23.
Muri raporo nshya, inzobere za ONU zivuga ko izi mpande zombi "zigabanaho ibitero mu gihe kimwe".
Umunyamakuru wa Radio Okapi yabajije Muyaya niba kubera izo mpamvu yavuze ibiganiro bya Doha byarahagaze, maze arasubiza ati:
"Birumvikana, kuri twe bagomba kuva muri Uvira, bagomba gusubira ku mirongo y'ibanze bahozeho". Ntabwo yasobanuye iyo mirongo iyo ari yo.
Abajijwe niba bazasubira mu biganiro bya Doha ari uko M23 yasubiye inyuma kuri iyo mirongo, Muyaya yagize ati:
"Twe turi mu biganiro n'umuhuza [leta ya Qatar], kuko we ntitwigeze duhagarika kuganira na we…birumvikana ko u Rwanda kimwe na M23 bagomba [kubanza] gusubira inyuma aho bari bari kugira ngo ibyiciro bisigaye muri ibi biganiro [bya Doha] bitange umusaruro ubyitezwemo".
M23 ubu igenzura ibice binini mu ntara za Kivu ya Ruguru na Kivu y'Epfo n'imijyi ya Goma na Bukavu – imirwa mikuru y'izi ntara. Nyuma yo gufata umujyi wa Uvira mu kwezi gushize, ku gitutu cy'amahanga yatangaje ko yawuvuyemo, ibyo Kinshasa na Amerika nk'umuhuza bavuze ko atari ko bimeze.
