Ibicuruzwa Ubushinwa bwohereza hanze byarazamutse mu mezi abiri ashize nubwo Trump yongereye imisoro

Inyandiko gusa
Umugore urimo gutunganya ipine mu ruganda rw'imodoka mu Bushinwa.

Ahavuye isanamu, Getty Images

    • Umwanditsi, Osmond Chia
    • Igikorwa, Umunyamakuru ku bucuruzi
  • Igihe co gusoma: iminota 2

Ibicuruzwa Ubushinwa bwohereza mu mahanga byarazamutse cyane mu mezi abiri ya mbere y'uyu mwaka nubwo hari umwuka mubi mu bucuruzi hagati y'Ubushinwa n'Amerika.

Imibare ya letayerekana ko ibicuruzwa Ubushinwa bwohereza mu mahanga byazamutse kurenga 20% muri Mutarama (1) na Gashyantare (2) uyu mwaka, ibintu byikubye hafi gatatu ugereranyije n'uko abahanga mu bukungu bari babyiteze.

Ibi bishyira iki gihugu mu nzira yo kurenga inyungu y'ubucuruzi ya buri mwaka yaciye umuhigo yari yaragezweho mu 2025.

Bitangajwe mu gihe biteganyijwe ko Perezida w'Amerika Donald Trump akorera uruzinduko mu Bushinwa mu ntangiriro y'ukwezi gutaha kwa Mata (4) kugira ngo ahure na mugenzi we w'Ubushinwa Xi Jinping.

Iki gihugu cya kabiri mu bukungu ku isi gicungira cyane ku byoherezwa mu mahanga, ariko gihanganye n'ibibazo byinshi birimo ubucye bw'amafaranga y'abaguzi, igabanuka ry'abaturage, ndetse n'ikibazo ku isoko ry'imitungo.

Beijing ikunze guhuriza hamwe imibare y'ibicuruzwa by'ukwezi kwa mbere n'ukwa kabiri kugira ngo bayihuze n'imihango y'Umwaka Mushya w'Abashinwa (Lunar New Year), kuko uwo munsi uba ku matariki atandukanye buri mwaka.

Ibyo Ubushinwa bwohereza hanze byongerewe no gucyenerwa cyane kw'ibikoresho by'ikoranabuhanga ndetse n'ibikomoka ku buhinzi n'ibikorerwa mu nganda na byo byarazamutse.

Ubucuruzi hagati y'Ubushinwa n'ibihugu by'i Burayi bwazamutseho 27.8%, mu gihe ibyoherezwa mu bihugu byo mu muryango wa ASEAN w'ibihugu byo muri Aziya y'amajyepfo ashyira uburasirazuba birimo nka Thailand, Singapour na Philippines, byazamutseho hafi 30%.

Skip Ibisomwa cane and continue reading
Ibisomwa cane

End of Ibisomwa cane

Ariko ibicuruzwa Ubushinwa bwohereza muri Amerika byagabanutse ku kigero kirenga 10% kubera ko Trump yashyizeho imisoro ku bicuruzwa byinjira muri Amerika hamwe n'izindi ngamba zo gukemura ubusumbane mu bucuruzi hagati y'ibihugu byombi.

Mu cyumweru gishize, Ubushinwa bwashyizeho intego y'izamuka ry'ubukungu rya buri mwaka riri hagati ya 4.5% na 5%, igabanutse ugereranyije n'intego ya 5% yo mu 2025, yari yaragezweho cyane bitewe ahanini n'iyoherezwa mu mahanga ry'ibicuruzwa.

Ibicuruzwa Ubushinwa bwohereza mu mahanga ni inkingi y'ingenzi y'ubukungu bw'icyo gihugu, rikizamura nubwo ubucuruzi bw'imbere mu gihugu bwagabanutse ndetse n'isoko ry'imitungo ryaragabanutse.

Inama izahuza Trump na Xi izaba ibaye mu gihe Ubushinwa, kimwe n'ibindi bihugu byinshi byo muri Aziya, burimo guhangana n'ingaruka z'ubukungu zatewe n'intambara hagati y'Amerika na Israel na Iran, yahungabanyije isoko ry'ingufu ku isi.