Ukraine: Uburusiya bwavuze ko konona ari ko kwateje ibiturika bindi muri Crimea

Nyuma y'icyumweru habaye igisa nk'igitero cya Ukraine ku kibuga cy'indege cya gisirikare cy'Uburusiya ku mwigimbakirwa wa Crimea wigaruriwe n'Uburusiya, ububiko bw'intwaro bwo ku kindi kigo cya gisirikare na bwo bwibasiwe n'urukurikirane rw'ibiturika.

Abategetsi bavuze ko ari "ukonona", bavuga ko umuriro ari wo wateje ibyo biturika mu karere ka Dzhankoi.

Undi muriro wibasiye ikigo cy'amashanyarazi (umuyagankuba mu Kirundi) ndetse n'inzira ya gariyamoshi irangirika.

Mu cyumweru gishize, urukurikirane rw'ibiturika byasenye indege z'intambara z'Uburusiya ku kibuga cy'indege cya gisirikare cyo ku nyanja y'umukara (Black Sea/Mer Noire) ku nkombe ya Crimea.

Ukraine ntiyemeye ko ari yo yagabye icyo gitero.

Ariko Mykhailo Podolyak, umujyanama mu biro bya Perezida wa Ukraine, yavuze ko iki cya vuba aha cyabaye ari igikorwa cyo "gukuraho ibya gisirikare kirimo kuba", asobanura ko ibyo biturika bitabayeho ku bw'impanuka.

Uburusiya bwafashe Crimea mu 2014, ubundi buyiyomekaho buyikuye kuri Ukraine.

Uburusiya ntibwasobanuye ubwoko bwo konona bwo mu gitero cyo ku wa kabiri.

Urwego rw'ubutasi rw'Uburusiya, FSB, rwavuze ko muri uku kwezi abononnyi b'Abanya-Ukraine banaturikije ibyuma bitandatu binyuraho insinga z'amashanyarazi by'imbere mu Burusiya ubwabwo.

FSB yongeyeho ko ibyo bitero byo mu karere ka Kurchatov, kari ku ntera ya kilometero hafi 100 uvuye ku mupaka wa Ukraine wo mu majyaruguru ashyira uburasirazuba, byagize ingaruka ku "buryo bw'ikoranabuhanga bw'imikorere" y'uruganda rw'ingufu kirimbuzi rwa Kursk.

Ariko kompanyi Rosenergoatom ikoresha urwo ruganda ntiyemeranya n'ibyavuzwe na FSB.

Iyi kompanyi yavuze ko igabanuka ry'umusaruro w'uruganda ryatewe n'"ikibazo muri stasiyo ntoya yo hanze y'ubutaka buriho uruganda rw'ingufu kirimbuzi".

Minisiteri y'ingabo z'Uburusiya yavuze ko ibyaturitse ku wa kabiri mu majyaruguru ya Crimea byabereye ahantu hari habitswe intwaro by'igihe gito mu kigo kiri hafi y'icyaro cya Maiske ahagana saa kumi n'ebyiri n'iminota 15 za mu gitondo (6:15).

Minisiteri y'ingabo z'Uburusiya yavuze ko nta byangiritse "bikomeye".

Ariko Sergei Aksyonov, umutegetsi w'ako karere washyizweho n'Uburusiya, yasuye aho byabereye, avuga ko abantu 2,000 bakuwe mu cyaro kiri hafi aho kandi ko abantu babiri bakomeretse.

Yagize ati: "Umugabo umwe yari afite igikomere cyatewe n'igisigazwa cy'igisasu naho undi yangijwe n'urukuta. Ku bw'amahirwe, ubuzima bwabo ntiburi mu kaga".

Yuriy Ignat, umuvugizi w'igisirikare cya Ukraine kirwanira mu kirere, yavuze ko ibyaturitse byatewe n'uko Uburusiya "budakurikiza amabwiriza yo kwirinda inkongi".

Mu kiganiro n'abanyamakuru, Ignat yagize ati: "Birumvikana ko twishimiye ibyabaye, kubera ko Dzhankoi [aho ibiturika byabereye] ari hamwe mu hantu umwanzi abika indege za kajugujugu ze n'ibindi bikoresho".

Ubwo Uburusiya bwatangiraga igitero cyabwo kuri Ukraine ku itariki ya 24 y'ukwezi kwa kabiri uyu mwaka, abasirikare babwo bakoresheje ibigo bya gisirikare by'Uburusiya byo muri Crimea mu gufata ahantu hanini mu majyepfo ya Ukraine.

Aho Uburusiya bwigaruriye hariyongereye by'umwihariko mu turere tubiri bwo mu majyepfo, twa Kherson na Zaporizhzhia.

Ukraine yasezeranyije kugaba igitero cyo kwisubiza uturere twigaruriwe n'Uburusiya.