Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Ukraine: Mu gihe Ubwongereza bwigengesera ku mafaranga, turabara abishwe – Olena Zelenska
Rob Corp
Ikiganiro Sunday with Laura Kuenssberg
Umugore wa Perezida wa Ukraine yabwiye BBC ko ingaruka yo mu rwego rw'ubukungu y'intambara yo muri Ukraine ikomereye ibihugu by'inshuti zayo, ariko ko mu gihe Abongereza "bigengesera [bitwararika] ku mafaranga" yabo, Abanya-Ukraine bo "barabara abishwe".
Olena Zelenska yabwiye ikiganiro Sunday with Laura Kuenssberg ko ubufasha Ukraine ihabwa bubaye ari bwinshi, amakuba yamara igihe kigufi kurushaho.
Mu kiganiro cyafatiwe amashusho mu murwa mukuru Kyiv wa Ukraine, Zelenska yavuze ko ari ingenzi gukomeza kugaruka ku bicirwa muri iyi ntambara.
Ndetse Zelenska yavuze ko nubwo ari gacye cyane abona umugabo we, ko bavugana buri munsi.
Mu 2003 ni bwo uyu mugore yashakanye na Perezida wa Ukraine Volodymyr Zelensky. I Kyiv ni ho yavuganiye n'umunyamakuru wa BBC Laura Kuenssberg.
Mu kiganiro ku ngingo zitandukanye cyatangajwe kuri iki cyumweru tariki ya 4 y'ukwezi kwa cyenda, Zelenska yabajijwe ubutumwa yagenera Abongereza barimo guhura n'ikibazo cy'ibiciro by'ingufu z'amashanyarazi birimo gutumbagira, ku ruhande rumwe bitewe n'igitero cy'Uburusiya kuri Ukraine n'ingaruka cyagize kuri biciro bya gas (gaz) n'ibitoro ku isi.
Yagize ati: "Ndabyumva ko ibintu bikomeye cyane. Ariko reka nibutse ko mu gihe cy'icyorezo cya Covid-19, kandi kiracyari kumwe natwe, igihe hari hariho izamuka ry'ibiciro, Ukraine na yo byayigizeho ingaruka.
"Ibiciro birimo kuzamuka no muri Ukraine. Ariko icyiyongeraho ni uko abantu bacu barimo kwicwa.
"Rero mu gihe mutangiye kwigengesera ku mafaranga yo kuri konti yanyu yo muri banki cyangwa yo mu mufuka wanyu, natwe ni ko tubigenza tukanabara abacu bishwe".
Amagambo ya Zelenska akurikiye ibyo Minisitiri w'intebe w'Ubwongereza Boris Johnson yavugiye i Kyiv mu ruzinduko yahagiriye mu kwezi gushize, aho yumvikanishije ko ingo zo mu Burayi bwose zizahura n'amakuba avuye ku kiguzi cy'imibereho no ku "kugumana" na Ukraine mu guhangana n'ubushotoranyi bw'Uburusiya.
Mu Bwongereza, ikigero cy'izamuka ry'ibiciro no gutakaza agaciro kw'ifaranga biteganyijwe ko kizagera ku kigero cya mbere cyo hejuru cyane kibayeho mu myaka 42 ishize, kikagera kuri 13.3% muri uyu mwaka, mu gihe ubukungu bwitezweho kugabanuka mu gihe kirenga umwaka.
Banki nkuru y'Ubwongereza yavuze ko impamvu y'ingenzi itera ibyo ari ukwiyongera kw'igiciro cy'ingufu z'amashanyarazi (cyangwa umuyagankuba mu Kirundi), kongererwa ubukana n'igitero cy'Uburusiya kuri Ukraine.
Ibihugu by'i Burayi byashinje Uburusiya - bwohereza ku isi ingufu nyinshi z'amashanyarazi - gukoresha gas nk'intwaro, mu kugabanya iyo bwohereza mu mahanga kubera ibihano bwafatiwe n'uburengerazuba (Uburayi n'Amerika), ikirego Uburusiya bwahakanye.
Olena Zelenska ni nde?
- Yavutse ku itariki ya 6 y'ukwezi kwa kabiri mu mwaka wa 1978, avukira mu mujyi wa Kryvyi Rih, wo mu karere ko hagati muri Ukraine kavuga ururimi rw'Ikirusiya
- Muri kaminuza yize ibyo gukora imbata (guha iforoma) z'inyubako
- Mu kwezi kwa cyenda mu 2003 ni bwo yashakanye na Volodymyr Zelensky
- Afite abana babiri - umukobwa Oleksandra n'umuhungu Kyrylo
- Yahindutse umugore wa Perezida ubwo umugabo we yatorerwaga kuba Perezida mu mwaka wa 2019
