Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Kherson: Ukraine ivuga ko yateye indi ntambwe mu karere kagenzurwa n'Uburusiya
Leo Sands & Yaroslav Lukov
BBC News
Igisirikare cya Ukraine kivuga ko cyameneye mu murongo wa mbere w'ubwirinzi bw'Uburusiya mu karere bwigaruriye ka Kherson.
Uko gutera intambwe kwatangajwe, gusa nk'ukugize igitero cyo kwigaranzura cyari kimaze igihe kirekire gitegerejwe, kirimo gukorwa na Ukraine, mu kugerageza kwisubiza amajyepfo y'igihugu.
Bikurikiye ibyumweru byari bishize by'ibitero bya Ukraine bigamije guca (gukata) inzira z'ingenzi abasirikare b'Uburusiya baho bakoresha mu kongera abasirikare n'ibikoresho.
Igisirikare cy'Uburusiya kivuga ko abasirikare ba Ukraine "batakaje byinshi" mu igerageza ryananiwe ryo gukora igitero.
Ibi bivugwa na Ukraine n'Uburusiya ntibyagenzuwe mu buryo bwigenga.
Uburusiya bugenzura ibice binini by'akarere ka Kherson ko muri Ukraine, kuva bwayigabaho igitero ku itariki ya 24 y'ukwezi kwa kabiri uyu mwaka.
Mbere yaho ku wa mbere, itsinda ry'ibikorwa rya Ukraine ryo mu mujyi wa Kakhovka wo mu majyepfo ryavuze ko umutwe (itsinda) w'abasirikare bashyigikiwe n'Uburusiya wavuye mu birindiro byawo mu karere ka Kherson.
Ryongeyeho ko abasirikare b'Uburusiya bamanukira mu mitaka batanga inyunganizi, bahunze urugamba.
Oleksiy Arestovych, umujyanama w'umukuru w'ibiro bya Perezida Volodymyr Zelensky, nyuma yanavuze ko abasirikare ba Ukraine "bameneye mu murongo wa mbere wo ku rugamba ahantu henshi".
Hagati aho, ababibonye batangaje ko bumvise ibiturika bindi mu mijyi ya Kherson na Nova Kakhovka, ku ntera ya kilometero hafi 55 mu majyaruguru ashyira uburasirazuba uvuye mu murwa mukuru w'ako karere.
Ahantu h'ingenzi ho kwambukira ku mugezi wa Dnipro ho kuri iyo mijyi ibiri, hakomeje kwibasirwa n'igisirikare cya Ukraine mu byumweru bya vuba aha bishize.
Ibiro ntaramakuru Ria Novosti bya leta y'Uburusiya byatangaje ko umujyi wa Nova Kakhovka wasigaye nta mashanyarazi (umuyagankuba mu Kirundi) n'amazi ufite muri iryo joro.
Mu ijambo rye rya nijoro, Perezida Zelensky yaburiye bikomeye abasirikare b'Uburusiya, ati:
"Niba bashaka kurokoka, iki ni cyo gihe ngo abasirikare b'Uburusiya bahunge. Mujye iwanyu".
Zelensky n'abandi bategetsi bo ku rwego rwo hejuru ba Ukraine bakomeje kunuma ku bijyanye n'amakuru arambuye ku gitero cyatangajwe cyo kwigaranzura Uburusiya, bashishikariza Abanya-Ukraine gutegereza bihanganye.
Isubiza ku bivugwa na Ukraine, minisiteri y'ingabo z'Uburusiya yavuze ko abasirikare ba Ukraine bagerageje gukora igitero muri Kherson no mu turere bituranye two mu mujyi wa Mykolaiv.
Amagambo y'iyi minisiteri yasubiwemo n'ibiro ntaramakuru bitandukanye bya leta y'Uburusiya ivuga ko iki gitero cyananiwe, kandi ko abasirikare ba Ukraine "batakaje byinshi".
Abategetsi bo muri Ukraine bavuga ko bakoresheje uburyo bw'ibisasu bya rokete Ukraine yahawe n'Amerika, buzwi nka 'High Mobility Artillery Rocket System' (HIMARS), mu gusenya amateme atatu yo ku mugezi wa Dnipro.
Abasirikare bo mu bihugu byo mu burengerazuba (Uburayi n'Amerika) bavuga ko ibitero bya Ukraine bijyanye n'igikorwa cyo kubuza abasirikare b'Uburusiya kugera ku nkombe y'iburyo (yo mu burengerazuba) y'uwo mugezi, hagamijwe kwisubiza akarere kose ka Kherson.
Uburusiya bwakomeje gucungira kuri aya mateme kugira ngo bushobore kongera ibikoresho n'abasirikare babwo.
Kherson, yari ituwe n'abaturage 290,000 mbere y'iyi ntambara, ni wo murwa mukuru w'akarere wonyine wafashwe n'abasirikare b'Uburusiya. Ubu itegekwa n'abategetsi bashyigikiwe n'Uburusiya.
