Amerika na Venezuela bemeranyije gusubukura umubano wa dipolomasi nyuma y'ifatwa rya Maduro

Amerika na Venezuela byemeranyije kongera gushyiraho umubano wa dipolomasi n'uwo mu rwego rw'ambasade hagati y'ibihugu byombi.

Mu itangazo yasohoye, minisiteri y'ububanyi n'amahanga y'Amerika yavuze ko impande zombi zizafatanya mu guteza imbere umutekano, kuzahura ubukungu no guteza imbere ubwiyunge bwa politiki.

Nubwo umubano wa dipolomasi hagati y'ibihugu byombi watangiye kugenda utera imbere kuva ingabo z'Amerika zifashe Perezida wa Venezuela, Nicolás Maduro, muri Mutarama (1) mu gitero gitunguranye, itangazwa ku mugaragaro ry'umubano w'ibihugu byombi rifatwa nk'ikimenyetso cy'intambwe ikomeye cyane.

Perezida Donald Trump yategetse ingabo gufata Maduro n'umugore we, babajyana mu rukiko rwa Manhattan muri Amerika kugira ngo baburanishwe ku byaha bijyanye n'intwaro n'ibiyobyabwenge, ibyaha bo bahakana.

Ambasade y'Amerika mu murwa mukuru Caracas wa Venezuela, yari yarafunzwe mu mwaka wa 2019, yamaze kongera gufungura, kandi Washington yamaze no kohereza umudipolomate mushya muri Venezuela.

Ku wa kane, leta ya Venezuela yatangaje ko yiteguye gutangira "icyiciro gishya cy'ibiganiro byubaka, bishingiye ku kubahana hagati y'impande zombi".

Yavuze ko uwo mubano ugomba gutuma habaho "ibyishimo byo mu mibereho n'ubukungu by'abaturage ba Venezuela."

Ariko itangazo ryaturutse i Caracas ntiryigeze rivuga ku bijyanye n'inzibacyuho cyangwa amatora yo mu gihe kiri imbere, bitandukanye n'itangazo rya minisiteri y'ububanyi n'amahanga y'Amerika.

Amerika yashinje Maduro - witezwe kuburanishwa uku kwezi muri Amerika - n'abandi mu bagize leta ye kuyobora umuryango w'abagizi ba nabi ukora ibikorwa birimo ubucukuzi bw'amabuye y'agaciro butemewe n'amategeko no gucuruza ibiyobyabwenge.

Abantu banyuranye babwiye BBC ko hari abadipolomate b'inyongera baturutse kuri ambasade y'Amerika i Bogotá muri Colombia bazimurirwa i Caracas vuba. Ibi bizatuma abategetsi bashobora kugirana ibiganiro imbonankubone no gutanga serivisi zo kuri ambasade mu buryo bworoshye kurushaho.

Minisiteri y'ububanyi n'amahanga y'Amerika yavuze ko imikoranire yayo yibanda ku gufasha abaturage ba Venezuela gutera imbere binyuze mu "buryo buri mu byiciro bugamije gushyiraho ibisabwa kugira ngo habeho inzibacyuho yo mu mahoro igana kuri leta itorwa mu buryo bwa demokarasi".

Nyuma yo gusura Venezuela, Minisitiri w'ubutegetsi bw'igihugu w'Amerika, Doug Burgum, yabwiye abanyamakuru ku kibuga cy'indege i Caracas ku wa kane, mbere yo gusubira muri Amerika, ko gutera Venezuela mbere ya Irani byari "icyemezo cyiza cyane".

Amerika na Israel byatangije igikorwa cya gisirikare kuri Irani ku wa 28 Gashyantare (2), aho Umutegetsi w'Ikirenga wa Irani, Ayatollah Ali Khamenei, yishwe mu gitero cya mbere cy'ibisasu.

Burgum, uyobora inama y'igihugu ya Perezida Trump ishinzwe guteza imbere ingufu (National Energy Dominance Council), ku wa kane yongeyeho ko icyo gikorwa kizafasha mu gutuma "ibiva kuri peteroli bizatemba bijya muri Amerika".

Kuva igabye ibitero bya gisirikare kuri Venezuela no gufata Maduro, Amerika yagiranye na Venezuela amasezerano mashya y'ibikomoka kuri peteroli.

Washington yemereye Venezuela kugurisha ibikomoka kuri peteroli byari byarafatiwe ibihano ariko bikagenzurwa n'Amerika, kandi Venezuela yahinduye amategeko yayo kugira ngo yemere ishoramari ryinshi ry'amahanga mu bikomoka kuri peteroli.

Ku wa gatatu, Perezida w'agateganyo wa Venezuela Delcy Rodríguez na Minisitiri Burgum batangaje ko ibihugu byombi bizakorana mu guteza imbere ubucukuzi bw'amabuye y'agaciro muri icyo gihugu.

Uretse kuba ifite ububiko bw'ibikomoka kuri peteroli bwa mbere bunini cyane bwagaragajwe ku isi, Venezuela ikungahaye kuri zahabu, diyama, amabuye y'agaciro y'ingenzi cyane mu ikoranabuhanga rigezweho n'amabuye adakunze kuboneka (rare earth minerals) - arimo n'amwe mu yakoreshwa mu gukora telefone zigendanwa.