Champions League: Manchester City ishobora kwihimura kuri Real Madrid bongeye guhurira muri 1/2?

Mu mwaka ushize Manchester City yahuye na kumwe mu gutsindwa kubabaje cyane mu mateka yayo i Burayi ubwo yakinaga na Real Madrid - ariko ubu ifite amahirwe yo kwihimura.

Mu mwaka wa kabiri w'imikino wikurikiranya, City na Real bashyizwe hamwe mu mikino ya kimwe cya kabiri cya Champions League.

Mu mwaka ushize, City yageze ku munota wa nyuma wo mu mukino wo kwishyura i Bernabeuicyeneye gusa kudatsindwa ibitego bibiri.

Nyamara iza gutsindwa ibyo bitego bibiri mu buryo budasanzwe.

Mu gihe City yari yatsinze umukino ubanza iwayo i Etihad ku bitego 4-3, Riyad Mahrez yaje kuyongerera icyizere cyo gukomeza ubwo yatsindaga igitego mu mukino wo kwishyura, biba igiteranyo cy'ibitego 5-3.

Ariko Rodrygo wari winjiye mu kibuga asimbuye ku ruhande rwa Real, yayitsindiye ibitego bibiri ku munota wa 90 no ku munota wa 91, ayo yari na yo mashoti abiri ya mbere Real yari iteye mu izamu.

Nuko Karim Benzema atsinda igitego cy'intsinzi cyo kuri penaliti mu gihe cy'inyongera, ashimangira intsinzi itangaje y'igiteranyo cy'ibitego 6-5 mu mikino yombi - ndetse birangira iyi kipe y'umutoza Carlo Ancelotti itsinze Liverpool ku mukino wa nyuma, yegukana igikombe cya Champions League.

Ariko hari ukwiyumva kwa nyako ko ibintu bishobora guhinduka muri uyu mwaka, nyuma yuko City isezereye muri kimwe cya kane Bayern Munich ku giteranyo cy'ibitego 4-1, ikagera ku mukino wa kimwe cya kabiri ku nshuro ya gatatu yikurikiranya - cyane cyane ifite na rutahizamu Erling Haaland umaze kuyitsindira ibitego 48 mu mikino yose muri uyu mwaka w'imikino.

Mu mukino wo kwishyura waraye ubereye ku kibuga Allianz Arena cya Bayern, amakipe yombi yanganyije igitego 1-1. Haaland ni we wafunguye izamu ku munota wa 57, icyo gitego kiza kwishyurwa na Joshua Kimmich ku munota wa 83.

Umutoza wa City Pep Guardiola, wigeze gutoza mucyeba ukomeye cyane wa Real ari we Barcelona, yagize ati: "Nabyiyumvagamo ko dushobora guhura na bo".

Guardiola yongeyeho ati: "Amakipe yose arabizi ko niba ushaka gutsindira Champions League uba ucyeneye gutsinda Real Madrid".

Real imaze kwegukana ibikombe 14 by'Uburayi, bikubye kabiri iby'indi kipe iyo ari yo yose - birimo na bitanu muri byo yegukanye mu myaka icyenda ishize.

Abajijwe ku mahirwe yo kwihimura kuri Real ku itariki ya 9 na 17 Gicurasi (5), umukino wo kwishyura uzabera kwa City, Bernardo Silva, ukina hagati muri iyi kipe, yagize ati: "Yego reka tubyizere!"

Yongeyeho ati: "Nta kabuza tuzabigerageza. Buri gihe turabigerageza, ariko ubu turumva ikipe ifite icyizere cyinshi cyane kuri uyu munota. Ntekereza ko tuzakomeza [ku mukino wa nyuma]".

Nedum Onuoha, wahoze ari myugariro wa City, yari ari gutangaza iby'uyu mukino kuri BBC Radio 5 Live. Atekereza ko uko gushaka kwihimura bizongerera umuhate City.

Ati: "Mbivuzeho ndi mu ruhande rw'umufana, nta kabuza ko ari byo barimo gutekereza". Yongeyeho ati: "Ntekereza ko bazi ko kugeza ku munota wa 90 mu mwaka ushize bari bongeye gusubira ku mukino wa nyuma.

"Niba uri ikipe itsinda Real Madrid muri iri rushanwa ugomba kwemera ko ushobora gutsindira buri kintu cyose [n'igikombe]".

Joleon Lescott, na we wahoze ari myugariro wa City, yabwiye igitangazamakuru BT Sport ati: "Real Madrid ni ikintu cyihariye. Mu mwaka ushize ntibari ikipe ikomeye cyane kandi mu gihe cy'iminota 12 bahinduye umukino barawutsinda.

"Ntekereza ko Real Madrid ifite kumva ko muri iri rushanwa hari icyo izageraho. Niba babonye amahirwe arindwi, bazabonamo ibitego bitanu.

"Ariko iyi ni City itandukanye. Ntitwari twarabonye Manchester City ishobora kwizera ubwugarizi mu mukino nkuko iyi ibikora".

Izatsinda hagati ya City na Real izahura na AC Milan cyangwa Inter ku mukino wa nyuma, uzabera i Istanbul muri Turukiya ku itariki ya 10 Kamena (6) uyu mwaka.