Abasirikare ba MONUSCO batawe muri yombi muri DR Congo ni abo muri Tanzania – UN
Ahavuye isanamu, Getty Images
Ababungabunga amahoro batawe muri yombi ku cyumweru kubera kurasa bakica abantu batatu mu mujyi wa Kasindi muri Repubulika ya Demokarasi ya Congo uri ku mupaka na Uganda ni Abanyatanzania, nkuko umutegetsi wo ku rwego rwo hejuru muri ONU (UN) yabibwiye BBC.
ONU yamaganye bikomeye iryo raswa ry'abo baturage, ryanakomerekeyemo abantu 15.
Kugeza ubu abantu 36 bose hamwe ni bo biciwe mu myigaragambyo irimo urugomo yo kwamagana abasirikare ba ONU babungabunga amahoro muri DR Congo, bari mu butumwa buzwi nka MONUSCO, naho abandi 170 barakomereka, nkuko bitangazwa na leta ya Congo.
Muri abo bishwe harimo n'ababungabunga amahoro bane ba MONUSCO.
Abanyecongo benshi bashinja MONUSCO kunanirwa kubarinda ibitero by'imitwe y'inyeshyamba.
Nubwo iryo raswa ry'abaturage ryo ku cyumweru rizarushaho guhindanya (kwanduza) isura ya MONUSCO, abanyamakuru bavuga ko igisirikare cya Congo na cyo kinengwa kubera kunanirwa kugarura umutekano muri ako karere, gakoreramo imitwe yitwaje intwaro ibarirwa muri za mirongo.
