Liverpool: Mohamed Salah yakuyeho umuhigo wa Robbie Fowler wo kuyitsindira ibitego byinshi muri Premier League

Mu kajagari ko mu gice cya kabiri ubwo Liverpool yigirizagaho nkana Manchester United, Mohamed Salah yanditse amateka.

Ku ishoti ye yatumye Liverpool igira ibitego 6 - byo mu ntsinzi yabo ya 7-0 - uyu rutahizamu w'Umunyamisiri, w'imyaka 30, yabaye umukinnyi wa mbere w'ibihe byose utsindiye Liverpool ibitego byinshi muri Premier League.

Ku cyumweru, Salah yatsinze igitego cye cya 128 n'icya 129 mu mikino 205 amaze gukinira Liverpool muri iyi shampiyona.

Mu gutsinda ibyo bitego bibiri ubwo bakinaga na United, Salah yashoboye guca ku mugabo abafana ba Liverpool bazi ku izina ry''Imana' (y'ibitego).

Salah yaciye kuri Robbie Fowler, aba umukinnyi wa mbere utsindiye Liverpool ibitego byinshi mu mateka ya Premier League. Biba byiza kuri we kubikorera ku kibuga Anfield cya Liverpool - byongeye bakina na United.

Ku cyumweru ubwo yari abajijwe uko abyishimira, yagize ati: "Ndi kumwe n'umuryango wanjye nywa icyayi ubundi nsinzire".

Yasoje igikorwa cyo kugarukana (gusubirana inyuma) cyakozwe nk'umurabyo atera mu gisenge cy'izamu rya David de Gea ku munota wa 66, ubwo yatsindaga igitego cye cya mbere muri uwo mukino, cyari icya kane cy'ikipe ye, ahita aba umukinnyi wa mbere wa Liverpool utsinze mu mikino itandatu ikurikirana mu marushanwa yose bahuriyemo na United.

Nuko ku munota wa 83 atsinda igitego cye cya kabiri, cyabaye icy'umuhigo, ndetse kiba n'icya 10 mu bitego amaze gutsinda United muri Premier League - nta wundi mukinnyi n'umwe wa Liverpool urayitsindira nk'ibyo.

Salah amaze igihe ari uwa mbere mu bateza ibyago kuri United - ibitego 10 amaze kuyitsinda byatumye anyura kuri Steven Gerrard watsinze United ibitego umunani muri Premier League. Mu kubigenza gutyo, Salah yashimangiye ko ari we munyabigwi wo muri iki gihe wa Liverpool.

Amaze gutsinda ibitego amakipe 26 atandukanye muri Premier League, atsinda ibitego icyenda mu mikino bakinnye na Watford na West Ham, n'ibitego umunani mu mikino bakinnye na Bournemouth.

Ariko Salah amaze gutsinda Manchester United ibitego byinshi muri shampiyona kurusha ibyo yatsinze indi kipe. Ntibitunguranye rero kuba akunzwe n'abafana hamwe n'abanyabigwi ba Liverpool.

Jamie Carragher, wahoze akinira Liverpool, yabwiye igitangazamakuru Sky Sports ati: "Nta na rimwe mpangayika kuri Salah.

"Buri gihe anyuzamo akamara imikino micyeya adatsinda ariko ni rutahizamu ukomeye.

"Yigaragaza mu mikino ikomeye, muri kuriya kuvuduka n'imbaraga...Ni umwe muri ba rutahizamu beza twigeze tubona muri Premier League".

Kwitwara neza muri shampiyona mu bihe bya vuba aha bishize - gutsinda imikino ine muri itanu no kwinjiza ibitego 13 kandi ntigire na kimwe itsindwa - byasubije Liverpool mu guhatanira umwanya wo gukina muri Champions League.

Ubu Liverpool irarushwa amanota atatu na Tottenham iri ku mwanya wa kane ku rutonde rw'agateganyo rwa shampiyona, ikaba ifite umukino itarakina.

Kugira ngo Liverpool ishobore gusubira muri Champions League, umutoza Jurgen Klopp ntashidikanya ko uruhare rwa Salah ruzaba ingenzi kugira ngo ibigereho.

Nyuma yo kunyagira United, Klopp, avuga kuri Salah, yagize ati: "Ibitego ijana na makumyabiri n'icyenda - ibyo birarenze. Mbega umubare urenze ukwemera. Ni umukinnyi wihariye.

"Turamushima muri iki gihe ariko mu gihe kiri imbere abantu bazasubiza amaso inyuma batangare, bati 'twabonye ikintu cyihariye rwose'".

Salah yabwiye Sky Sports ati: "Ni ibintu byihariye cyane gutsinda umukino nka kuriya. Ducyeneye gukomeza kwicisha bugufi tugatsinda imikino yacu. Nizeye ko bizadusunika cyane".

Ku muhigo we, yagize ati: "Ni ikintu cyihariye cyane. Sinakubeshya. Uyu muhigo wari uri mu mutwe wanjye kuva naza hano".

Mu mwaka w'imikino wa 2017-2018, Salah yatsindiye urukweto rwa zahabu rw'umukinnyi watsinze ibitego byinshi muri Premier League ubwo yatsindaga ibitego 32.

Yongeyeho ati: "Ntekereza ko nyuma y'umwaka w'imikino wanjye wa mbere buri gihe nahataniraga uriya muhigo".

Uko Salah yitwaye mu mukino wo ku cyumweru bakinnye na United kwakuyeho ugushidikanya uko ari ko kose, atari gusa ku bushobozi bwe, ahubwo no ku muhate we muri Liverpool, nkuko yabivuze mu ncamake mu gisubizo yatanze ubwo yari abajijwe igitego akunda cyane mu bitego 129 amaze kuyitsindira.

Ati: "Icya nyuma".