Pentagon yirukanye umukuru w'ikigo cy'ubutasi nyuma y'isuzuma ku gitero kuri Irani

Inyandiko gusa
Lt Gen Jeffrey Kruse yambaye impuzankano ya gisirikare, ari mu nama k'akanama ko mu biro bya perezida w'Amerika, muri Gicurasi (5) mu mwaka wa 2025.

Ahavuye isanamu, Reuters

Insiguro y'isanamu, Lt Gen Jeffrey Kruse ntagikomeje kuba umukuru w'ikigo cy'ubutasi bwa gisirikare cy'Amerika (DIA)
    • Umwanditsi, Rachel Muller-Heyndyk
    • Igikorwa, BBC News

Minisitiri w'ingabo w'Amerika Pete Hegseth yirukanye umukuru w'ikigo cy'ubutasi mu biro bikuru by'ingabo z'Amerika (Pentagon), nyuma y'ibyumweru byari bishize ibiro bya perezida w'Amerika (White House) binenze bikomeye isuzuma ryo kumenya ingaruka z'ibitero by'Amerika kuri Irani.

Itangazo rya Pentagon rivuga ko Liyetona Jenerali (Lt Gen) Jeffrey Kruse atagikomeje kuyobora ikigo cy'ubutasi bwa gisirikare kizwi nka 'Defence Intelligence Agency' (DIA). Abandi bakomanda ba gisirikare bo ku rwego rwo hejuru na bo birukanwe na Pentagon.

Minisiteri y'ingabo ntiyahise isobanura impamvu yabirukanye.

Muri Kamena (6) uyu mwaka, Perezida w'Amerika Donald Trump yanenze bikomeye kuba raporo y'ubutasi y'ikigo DIA yarahishuriwe ibitangazamakuru.

Iyo raporo yavugaga ko ibitero by'Amerika kuri Irani icyo byakoze ari ugutinza gahunda ya nikleyeri y'icyo gihugu ho amezi gusa.

White House yatangaje ko isuzuma ry'icyo kigo "si ryo na busa".

Trump yari yatangaje ko ibigo bya nikleyeri byo muri Irani byashyenywe "burundu", ndetse yari yashinje ibitangazamakuru "igerageza ryo gutesha agaciro kimwe mu bitero bya gisirikare byagenze neza cyane mu mateka".

Icyo gihe, avugira mu nama y'umuryango wo gutabarana w'Uburayi n'Amerika (OTAN), Minisitiri Hegseth yari yavuze ko iyo raporo yakozwe ishingiye "ku makuru macyeya y'ubutasi" ndetse ko urwego rw'ubugenzacyaha muri Amerika (FBI) rwari rurimo gukora iperereza ku kuntu iyo raporo yahishuriwe ibitangazamakuru.

Skip Ibisomwa cane and continue reading
Ibisomwa cane

End of Ibisomwa cane

Skip podcast promotion and continue reading
WhatsApp channel ya BBC Gahuza

Amakuru ya BBC Gahuza ako kanya kuri WhatsApp yawe

Kanda hano ujyeho

End of podcast promotion

Iyirukanwa rya Lt Gen Kruse ryatangajwe bwa mbere n'ikinyamakuru the Washington Post cyo muri Amerika.

Ikigo DIA ni kimwe mu bigize Pentagon ndetse umwihariko wacyo ni ugukora ubutasi bwa gisirikare mu rwego rwo gufasha ibikorwa bya gisirikare (operations). Gikusanya amakuru menshi cyane y'ubutasi yo mu rwego rwa tekinike (ibikoresho n'imikorere), ndetse gitandukanye n'ibindi bigo by'ubutasi nka CIA.

Byumvikana ko Minisitiri Hegseth yanategetse ko umukuru w'umutwe w'inkeragutabara zirwanira mu mazi na komanda w'umutwe w'ibikorwa byihariye byo kurwanira mu mazi birukanwa, nkuko umuntu utatangajwe izina yabibwiye ibiro ntaramakuru Reuters ku wa gatanu.

Senateri w'Amerika Mark Warner yasohoye itangazo aburira ko iyirukanwa rya Kruse ari ikimenyetso ko Trump afite "akamenyero kabi ko gufata ubutasi nk'igipimo cy'ubudahemuka [kuri we] aho kuba ingabo ikingira [irinda] igihugu cyacu".

Trump amaze kwirukana abategetsi benshi bakoze isesengura ryabonywe ko rinyuranya n'uko we abibona.

Muri Nyakanga (7) uyu mwaka, Trump yavuze ko yategetse itsinda rye kwirukana "aka kanya" komiseri w'ibarurishamibare rijyanye n'abakozi n'umurimo, Erika McEntarfer, nyuma yuko atangaje raporo igaragaza ko guhanga imirimo byagabanutse.

No muri Mata (4) uyu mwaka, Trump yirukanye Jenerali Timothy Haugh ku buyobozi bw'ikigo cy'ubutasi cy'igihugu (NSA), hamwe n'abandi bakozi barenga 10 bo mu kanama k'umutekano w'igihugu ko muri White House.

Minisitiri Hegseth na we yirukanye abategetsi benshi ba gisirikare bo muri Pentagon. Muri Gashyantare (2) uyu mwaka, yirukanye Jenerali C Q Brown wo mu ngabo zirwanira mu kirere, wirukanwe hamwe n'abandi batanu b'amapeti ya 'admiral' ('amiral') na jenerali.