Ubutaliyani bwatangaje ibihe bidasanzwe by'amapfa mu majyaruguru

Ubutaliyani bwatangaje ibihe bidasanzwe mu turere dutanu two mu majyaruguru y'igihugu dukikije uruzi rwa Po, mu gihe hari amapfa (izuba ryinshi) ya mbere akaze abayeho mu myaka 70 ishize.

Uturere twa Emilia-Romagna, Friuli Venezia Giulia, Lombardy, Piedmont na Veneto tuzahabwa miliyoni 36.5 z'ama-euro y'imfashanyo y'ingoboka yo guhangana n'ubucye bw'amazi.

Amapfa ashyize ku nkeke ibirenga 30% by'umusaruro w'ubuhinzi w'Ubutaliyani, nkuko bivugwa n'ishyirahamwe Coldiretti ry'abahinzi.

Uduce twinshi twamaze gutangaza ko amazi agiye kujya asaranganywa, tumwe tukaba tuyabuze kugira ngo utundi na two tuyaboneho.

Ikirere gishyushye mu buryo budasanzwe hamwe n'imvura yabaye nkeya, byongereye ibura ry'amazi mu majyaruguru y'Ubutaliyani.

Leta y'Ubutaliyani yagize iti: "Igihe cy'ibihe bidasanzwe kigamije guhangana n'uko ibintu bimeze mu buryo n'ububasha budasanzwe".

Yavuze ko ishobora gufata izindi ngamba mu gihe nta mpinduka nziza yaba ibayeho.

Uruzi rwa Po ni rwo rurerure cyane mu Butaliyani, amazi yarwo akaba atemba yerekeza mu burasirazuba ku ntera irenga kilometero 650.

Abahinzi bo mu kibaya cyarwo bavuga ko amazi yo mu nyanja arimo umunyu ari kugenda yiroha muri uru ruzi, akangiza imyaka (ibihingwa).

Ku wa mbere, Minisitiri w'intebe w'Ubutaliyani Mario Draghi yasuye akarere k'imisozi miremire ka Dolomites, aho abantu 13 baburiwe irengero nyuma yuko urubura ruhirimye.

Yavuze ko "nta gushidikanya" aya makuba afitanye isano no gushyuha kw'isi.

Abantu batari munsi ya barindwi barapfuye naho abandi umunani barakomereka ku musozi wa Marmolada, bivuye ku kibuye cy'urubura cyahirimye.

Indege ntoya zitarimo abapilote (zizwi nka drones), ziriho uburyo bwo gufotora, zirimo kwifashishwa mu gushakisha ababuriwe irengero, barimo n'abanyamahanga.