Jenerali mu ngabo z'Uburusiya yishwe n'igisasu yatezwe mu modoka i Moscow

Abategetsi bavuze ko Jenerali w'Umurusiya yiciwe mu murwa mukuru Moscow n'igisasu cyari cyatezwe mu modoka.

Urwego rw'ubugenzacyaha rw'Uburusiya rwavuze ko Liyetona Jenerali (Lt Gen) Fanil Sarvarov yapfuye mu gitondo cyo ku wa mbere, nyuma yuko igiturika cyari cyahishwe munsi y'imodoka giturikijwe.

Ni we mutegetsi wa gisirikare wa gatatu wiciwe mu gitero cy'igisasu mu murwa mukuru w'Uburusiya muri uyu mwaka umwe ushize.

Urwo rwego rw'ubugenzacyaha rwavuze ko Sarvarov, wari ufite imyaka 56, yari umukuru w'ishami rishinzwe amahugurwamu ngabo z'Uburusiya.

Urwo rwego rwongeyeho ko igitekerezo (ingingo) kirimo gukorwaho iperereza ari uko icyo gisasu cyari cyahishwe aho bigizwemo uruhare n'inzego z'ubutasi za Ukraine. Ukraine nta cyo yabitangajeho.

Urwo rwego rwavuze ko Sarvarov yapfiriye mu bitaro bitewe n'ibikomere yari yagize, rwongeraho ko rwatangije iperereza ku bwicanyi no ku bucuruzi bunyuranyije n'amategeko bw'ibiturika.

Abakora iperereza boherejwe aho ibyo byabereye, ahantu haparikwa imodoka hafi y'inyubako y'amacumbi iri mu majyepfo ya Moscow.

Amafoto y'aho byabereye agaragaza imodoka y'umweru yo mu bwoko bwa Kia Sorento yangiritse cyane, imiryango yayo yavuyeho, ndetse ikikijwe n'izindi modoka.

Ibitangazamakuru byo mu Burusiya byatangaje ko mbere Sarvarov yarwanye mu ntambara y'aba Ossetian n'aba Ingush hamwe n'intambara n'aba Chechen mu myaka ya 1990 no mu ntangiriro z'umwaka wa 2000, ndetse ko yayoboye n'ibikorwa bya gisirikare muri Syria hagati y'umwaka wa 2015 na 2016.

Dmitry Peskov, umuvugizi w'ibiro bya Perezida w'Uburusiya (Kremlin), yavuze ko Perezida Vladimir Putin yahise amenyeshwa iby'urupfu rwa Sarvarov.

Kuva Uburusiya bugabye igitero gisesuye kuri Ukraine muri Gashyantare (2) mu mwaka wa 2022, abategetsi benshi ba gisirikare n'abandi bantu bakomeye bo mu Burusiya bagabweho ibitero mu murwa mukuru w'Uburusiya.

Darya Dugina, wari ufite imyaka 29 akaba yari umukobwa w'inshuti ya hafi cyane ya Putin, yishwe mu 2022 mu gicyekwa ko cyari igisasu cyatezwe mu modoka.

Lt Gen Yaroslav Moskalik yiciwe mu gitero cy'igisasu cyatezwe mu modoka muri Mata (4) uyu mwaka, naho Lt Gen Igor Kirillov yapfuye mu Kuboza (12) mu mwaka wa 2024, ubwo igikoresho cyari cyahishwe muri moto cyaturitswaga n'umuntu uri kure yacyo.

Nyuma yaho icyo gihe, uwahaye amakuru BBC wo muri Ukraine yavuze ko Kirillov yishwe n'ubutasi bwa Ukraine, nubwo ibi bitigeze na rimwe byemezwa ku mugaragaro. Mu mikorere yayo, Ukraine ntiyigera na rimwe yemera cyangwa yigamba ibitero bigambiriye abantu runaka.