Tamale Mirundi, wabaye umuvugizi wa Museveni, yapfuye ku myaka 60

Umunyamakuru Joseph Tamale Mirundi wo muri Uganda, wahoze ari umuvugizi wa Perezida Yoweri Museveni, yapfuye ku myaka 60, nkuko bivugwa n'ibitangazamakuru byo muri icyo gihugu.

Ikinyamakuru Daily Monitor cyasubiyemo amagambo y'abo mu muryango we ko Mirundi yapfuye ku wa kabiri, ahagana saa tanu z'ijoro, ku bitaro bya Kisubi, mu nkengero y'umurwa mukuru Kampala.

Byatangajwe ko yazize uburwayi bwo mu bihaha.

Icyo kinyamakuru cyasubiyemo umwe mu bahungu be agira ati: "Yari amaze ukwezi kurenga ari mu bitaro. Yari yatangiye no kugaragaza ibimenyetso byo koroherwa. Ku cyumweru no ku wa mbere, yabonekaga ko ameze neza."

Yongeyeho ati: "Abaganga bavuze ko yari afite amazi mu bihaha bye. Bari bamaze igihe bayavomamo."

Uwo muhungu yavuze ko ubuzima bwa se bwabaye nabi cyane ku wa kabiri, nuko ubwo abaganga "bageragezaga kuvoma ayo mazi bayasohora, haza amaraso".

Mirundi yavukiye mu karere ka Rakai, rwagati muri Uganda. Yize itangazamakuru kuri Kaminuza ya Makerere, imwe mu zikomeye muri Afurika.

Mu kiganiro na Daily Monitor mu 2014, Mirundi yisobanuye ko ari "umugabo ukaze, umugabo buri muntu wese atinya, umugabo ushobora gutongana no kurwana".

Icyo gihe yongeyeho ati: "Ndi n'umugabo wigejeje aho ngeze, ngahatana nkava mu bucyene bukomeye nkagera mu cyiciro cy'abatoni..."

Mu butumwa bwo ku rubuga nkoranyambaga X, umukuru w'inteko ishingamategeko ya Uganda Anita Among yavuze ko ababajwe cyane n'urupfu rw'"inshuti yanjye" Mirundi, anihanganisha abo mu muryango we n'inshuti ze.

Among yavuze ko Mirundi, nk'umunyamakuru, umukozi wa leta n'umusesenguzi wa politike n'ibibazo bijyanye n'imibereho, yatanze "umusanzu ukomeye ku gihugu cye, kandi kumubura bisize icyuho kinini cyane".

Mu mwaka wa 2019, Mirundi yavuze ko yarozwe ariko ntiyatanga amakuru arambuye.

Ntibisobanutse niba yari yarakize burundu uko kurogwa yavugaga, cyangwa niba hari isano gufitanye n'uburwayi bwo mu bihaha bwatangajwe ko yazize.

Mirundi yabaye umuvugizi wa Perezida Museveni mu mwaka wa 2003, umwanya yirukanweho mu 2015. Yigeze kwivuga ko yari "imbwa imoka ya Perezida".