Abasirikare bakuru ba Iran biciwe muri Syria mu gitero cagirizwa Israel

Abasirikare bakuru bakuru bane ba Iran biciwe mu gitero bikekwa ko ari ico indege ku mugwa mukuru wa Syria.

Igisirikare ca Iran cagiriza Israel gukora ico gitero, bivugwa ko cahitanye abahanuzi mu vya gisirikare bane hamwe n'abasirikare ba Syria benshi.

Israel nta co irabivugako. Haheze imyaka myinshi ikora ibitero ku bibanza birimwo abasirikare ba Iran muri Syria.

Ivyo bitero vyariyongereye kuva hatanguye intambara hagati ya Israel na Gaza yatanguye bivuye ku bitero Hamas yagize muri Israel itariki indwi z'ukwezi kwa Gitugutu (10) mu 2023.

Abategetsi bakuru mu gisirikare - abanye politike n'abajejwe ubutunzi ba Iran - bari muri Syria kuva intambara yadutse mu 2011, bafasha gushigikira ubutegetsi bwa prezida Bashar al-Assad mu kugwanya abagumukanye ubutegetsi bwiwe.

Bivugwa ko igitero co ku wa gatandatu cabereye mu micungararo ya Mazzeh, mu bumanuko bushira uburengero bwa Damas, akarere karimwo ikibuga c'indege ca gisirikare, co kimwe n'icicaro ca Onu, ama 'ambasade' n'uburiro.

Uwuhaba yabwiye itororokanirizo ry'amakuru rya AFP ko babonye "ibiturika" mu burengero bw'akarere ka Mazzeh hamwe "n'umwotsi mwinshi".

Yongeyeko ati:"Icaturitse cumvikanye nka misile, hanyuma inyuma y'iminota mike, numvise za rusehabaniha (Ambulances)."

Itororokanirizo ry'amakuru risa n'irya reta ya Iran, Mehr cavuze ko ico gitero cahitanye uwurongoye ikigo c'iperereza (IRGC), icegera ciwe, hamwe n'abandi basirikare babiri.

Video, BBC itarasuzuma neza, zerekana umwotsi mwinshi mu kirere n'amagorofa yasambutse.

Mu kwezi guheze ikikekwa kuba igitero ca Israel carabaye mu micungararo ya Damas gihitana umukomanda wo mu rwego rwo hejuru rwa IRGC.

Akarere k'uburasirazuba bwo hagati karagabirije kuva itariki 7 Gitugutu, aho Hamas yagira igitero mu bumanuko bwa Israel, gihitana abantu 1.300, benshi muri bo, aba sivire, bagira n'ingwati abashika 240.

Vyibazwa ko abarenga 132 boba bakigizwe ingwati mu karere ka Gaza.

Ibitero bitari vyitezwe vya Iran vyerekana ingene ako karere kari mu ngorane.

Abantu barenga 24.900 baramaze kwicwa kuva Israel itanguye kwihora ikoresheje inguvu za gisirikare, nk'uko bitangwazwa n'ubushikiranganji bwa Hamas bujejwe amagara y'abantu.

Israel ivuga ko ibitero vyayo vyo ku butaka no mu kirere muri Gaza bifise intumbero yo gusambura Hamas.

Iyo ntambara yatumye haba ubwoba ko ishobora gukwiragira mu karere kose, cane cane hagati y'abakeba bakomeye, Israel na Iran, mu gihe hari n'iyindi mishamirano iguma yaduka.

Israel igira ibitero ku muhari w'abanye Palestine, Hamas ufashwe mu mugongo na Iran. Iragwana kandi n'umuhari wa Hezbollah wo muri Liban, ushigikiwe na wo nyene na Iran.