Argentine yaretse kugenda muri bisi ifunguye hejuru mu mutambagiro i Buenos Aires kubera ibyishimo

Byabaye ngombwa ko abakinnyi ba Argentine batsindiye igikombe cy'isi bareka kugenda mu modoka ya bisi idatwikiriye hejuru batambagirana igikombe mu murwa mukuru Buenos Aires, ahubwo bagenda mu ndege ya kajugujugu hejuru y'abafana babarirwa muri za miliyoni basabwe n'ibyishimo bari mu mihanda.

Iyi kipe yerekanye icyo gikombe, mu ntangiriro y'urugendo rwari ruteganyijwe kumara amasaha umunani.

Ariko ibirori mu mihanda yari yakubise yuzuye byaje kuzamo akavuyo kurushaho, bituma iyi gahunda yongera gutekerezwaho.

Gabriela Cerruti, umuvugizi wa Perezida wa Argentine, yanditse kuri Twitter ati: "Ntibishoboka gukomeza [kugenda] ku butaka kubera ibyishimo byinshi".

Za videwo zashyizwe ku mbuga nkoranyambaga zisa nk'izerekana abafana basimbukira mu gice cyo hejuru cya bisi itwaye abakinnyi ubwo yari inyuze munsi y'iteme, umufana umwe arahubuka.

Leta ya Argentine yari yatangaje ko umunsi w'ejo ku wa kabiri uzaba ari ikiruhuko muri iki gihugu cyo muri Amerika y'Epfo, nyuma yuko Lionel Messi na bagenzi be batsinze Ubufaransa ku mukino wa nyuma w'igikombe cy'isi wo ku cyumweru.

Bigereranywa ko abantu bagera hafi kuri miliyoni enye bari bari mu mihanda y'i Buenos Aires.

Cerruti yongeyeho ati: "Uyu munsi Argentine yagize umwe mu minsi mikuru idasanzwe mu mateka yayo. Hari hari ibyishimo gusa no gushimira mu gihe cy'amasaha n'amasaha yo kuba umwe [gushyira hamwe] gushimishije".

Nyuma yo kugera iwabo mu masaha yo mu gitondo cyo ku wa kabiri bavuye muri Qatar, abakinnyi bavuye ku kibuga cy'imyitozo cy'ishyirahamwe ry'umupira w'amaguru rya Argentine (AFA), mu rugendo rwa kilometero 32 berekeza rwagati muri Buenos Aires, saa tanu n'iminota 45 (11h45) ku isaha yaho.

Urugendo rwari rwitezwe gusorezwa ku nyubako y'amateka izwi nka Obelisk (Obelisco), aho abantu babarirwa mu bihumbi amagana bari bateraniye.

Ariko abashinzwe umutekano ntibatumye iyo bisi ikomeza yerekeza ku rubuga rwa Plaza de la República aho iyo nyubako iri, nyuma yuko bimwe mu byishimo bibayemo akavuyo.

Chiqui Tapia, umukuru wa AFA, yanditse kuri Twitter ati: "Mbasabye imbabazi cyane mu izina ry'abakinnyi bose batsindiye igikombe. Birababaje".

Matias Gomez, w'imyaka 25, umwe mu bafana bari bateranye mu kwakira ikipe, yagize ati: "Birarenze, ni cyo kintu cyiza cyane gishobora kukubaho mu buzima.

"Ni ibyishimo byinshi cyane kubona aba bantu bose bishimye, bose hamwe, umwe ku wundi, bafatanye ibiganza, bahoberana, basomana. Uyu munsi twese turi umwe".

Messi, rutahizamu wa Paris St-Germain, wari kapiteni w'iyi kipe yatsindiye iki gikombe akanashimangira umwanya we kuri benshi nk'umukinnyi wa mbere ukomeye w'umupira w'amaguru wabayeho, yari yicaye hagati mu itsinda ry'abakinnyi mu gice cyo hejuru cya bisi.

Mbere yaho ku wa kabiri, yatangaje kuri Instagram ifoto imugaragaza abyutse ari kumwe n'igikombe cy'isi.