M23 irashinja FARDC "kwica abaturage benshi" ikoresheje za 'drones' i Rutshuru na Lubero
Ahavuye isanamu, AFC/M23
Umutwe wa AFC/M23 urashinja ingabo za leta bahanganye ko mu ijoro ryo ku wa gatatu rishyira ku wa kane zakoresheje 'drones' n'indege z'intambara zikarasa ibice bituwe n'abaturage muri teritwari za Rutshuru na Lubero muri Kivu ya Ruguru, ko "ibyo bitero byatwaye ubuzima bw'abasivile benshi" abandi na bo barahunga.
Mu kwerekana ishusho y'ibyabaye, umuvugizi w'uyu mutwe Lawrence Kanyuka yagaragaje amafoto y'inzu zangiritse muri ibyo bitero avuga ko byakozwe n'ingabo za leta n'abafatanya na zo.
BBC yabajije uruhande rw'ingabo za leta kuri ibi ruregwa na M23, ntacyo rurasubiza. Abasesenguzi bamwe bo bakemanze ibivugwa bahereye ku mafoto yatangajwe, bavuga ko ibisasu bya 'drones' cyangwa indege za gisirikare bitasiga inzu zubakishije ibiti, imbingo, ibyondo n'amabati uko zagaragajwe.
Bimwe mu binyamakuru byo ku ruhande rwa leta ya Kinshasa byavuze ko izo ndege zarashe kuri zimwe mu nzu zibikwamo ibikoresho bya gisirikare bya M23.
BBC ntiyabashije kugenzura mu buryo bwigenga ibivugwa n'impande zitandukanye kuri ibi bitero.
M23 yo ivuga ko ibitero nk'ibi bitegurirwa ku biro by'ingabo za leta n'abafatanya na zo biri mu mujyi wa Uvira mu ntara ya Kivu y'Epfo na Bujumbura mu Burundi.
Mu itangazo ry'umuvugizi wayo, AFC/M23 irenzaho ko imbere y'ibyo bitero bitwara ubuzima bw'abantu isanga "igomba kugira icyo ikora kugira ngo irengere inarokore ubuzima bw'inzirakarengane…"
Bamwe ubwo butumwa babona ko busobanuye ko M23 igiye gutera umujyi wa Uvira, ubu wimuriwemo umurwa mukuru w'intara ya Kivu y'Epfo ahagenzurwa na leta, kuva AFC/M23 yafata umujyi wa Bukavu.
Mu kwezi gushize abarwanyi ba M23 bafashe agace ka Nzibira muri teritwari ya Walungu muri Kivu y'Epfo nyuma y'imirwano n'ingabo za leta yatumye abaturage babarirwa mu bihumbi bava mu byabo bagahunga, nk'uko byavuzwe na sosiyete sivile yaho.
Izi mpande zombi zimaze amezi zigerageza kugera ku masezerano y'amahoro i Doha muri Qatar ariko kugeza ubu ntibirashoboka. Buri ruhande rukomeza gushinja urundi kurenga ku gahenge kumvikanyweho rugatera agace kagenzurwa n'urundi.
Massad Boulos, intumwa nkuru ya Perezida Donald Trump kuri Afurika ivuga ko kugira ngo amasezerano y'amahoro agerweho hagomba "kubanza gushyirwaho ingamba zo kugirirana icyizere hagati y'impande zombi, kugira ngo zibone gutangira gukemura impamvu muzi z'aya makimbirane".
