Ubwongereza bwafatiye ibihano ba maneko b'Uburusiya kubera igikorwa cy'ubugizi bwa nabi

Minisiteri y'ububanyi n'amahanga y'Ubwongereza yafatiye ibihano ba maneko benshi b'Uburusiya kubera "igikorwa kirambye cy'ubugizi bwa nabi bwo kuri mudasobwa" ivuga ko bakoreye ahantu harimo no mu Bwongereza.

Amatsinda atatu yo mu butasi bwa gisirikare bw'Uburusiya (bwitwa GRU) na ba maneko 18 bahanwe kubera gushinjwa "gukwirakwiza akajagari n'akaduruvayo, ku mategeko yatanzwe na [Perezida w'Uburusiya Vladimir] Putin".

Minisitiri w'ububanyi n'amahanga w'Ubwongereza David Lammy yavuze ko icyo gikorwa cyabo gifitanye isano no kuba Ubwongereza bukomeje gufasha Ukraine, ndetse yavuze ko ba maneko ba GRU barimo "gukora igikorwa cyo guhungabanya Uburayi".

Mu yandi makuru, umuryango w'Ubumwe bw'Uburayi (EU) wafatiye Uburusiya "ibihano bya mbere bikomeye cyane" ubufatiye kugeza ubu. Perezida wa Ukraine Volodymyr Zelensky yavuze ko ibyo bihano ari "ingenzi cyane kandi biziye igihe".

Izi ngamba nshya za EU, zatangajwe ku wa gatanu, zirimo no guca ibikorwa by'igura n'igurisha bijyanye na gaze (gas) kamere yo mu muhora wa Nord Stream, no kumanura igiciro ibitoro by'Uburusiya bishobora kugurwaho.

Ubwongereza na bwo bwifatanyije n'iyo gahunda yo kumanura igiciro. Minisitiri w'imari w'Ubwongereza Rachel Reeves yavuze ko Uburayi burimo "gukanyaga ivisi ku kigega Kremlin [ibiro bya perezida w'Uburusiya] ikuramo amafaranga yo gukoresha mu ntambara".

Ibi bibaye mu gihe ibihugu by'inshuti by'i Burayi byizeye kongera igitutu ku Burusiya kugira ngo intambara yo muri Ukraine imaze imyaka irenga itatu irangire.

Ariko uwahoze ari Perezida w'Uburusiya Dmitry Medvedev, inshuti ya hafi ya Putin, yavuze ko ubukungu bw'Uburusiya buzarokoka ibyo bihano ndetse ko Uburusiya buzakomeza kurasa kuri Ukraine n'"imbaraga zigenda ziyongera".

Ibi bihano EU yafatiye Uburusiya ni icyiciro cya 18 cy'ingamba nk'izo imaze gufatira Uburusiya kuva igitero gisesuye cyabwo kuri Ukraine gitangiye mu mwaka wa 2022.

Abategetsi bo muri leta y'Ubwongereza bavuga ko ibyo bihano byo ku wa gatanu Ubwongereza bwafatiye ba maneko ba gisirikare 18 bo mu rwego rwa GRU ari cyo "gikorwa cya mbere kinini cyane kuri ba maneko b'Uburusiya" bukoze, kuva nyuma y'igitero cyo kurogesha ikinyabutabire cya Novichok bicyekwa ko byakozwe na ba maneko b'Uburusiya i Salisbury, mu majyepfo ashyira uburengerazuba bw'Ubwongereza, mu mwaka wa 2018.

Igikorwa Ubwongereza bwakoze nyuma y'icyo gitero, ni cyo cyari gikomeye cyane kuko cyabayemo kwirukana "abadipolomate" benshi b'Uburusiya, mu gihe ba maneko ba GRU batangajwe ku wa gatanu bo bifatwa ko bamaze gusubira mu Burusiya.

Minisiteri y'ububanyi n'amahanga y'Ubwongereza yavuze ko amatsinda y'ubutasi yafatiye ibihano – Itsinda 26165 – yagize uruhare mu kurasa ku mujyi wa Mariupol muri Ukraine, harimo n'igitero cyarashe ku nyubako y'imyidagaduro n'ikinamico muri uwo mujyi, cyishe abasivile babarirwa mu magana.

Iyo minisitero yanafatiye ingamba ba maneko bashyize porogaramu (software/logiciel) yo kuneka kuri telefone ya Yulia Skripal. Uyu hamwe na se bagabweho igitero i Salisbury mu 2018 n'abacyekwa ko ari ba maneko b'Uburusiya, bifashishije ikinyabutabire cya Novichok.

Minisiteri y'ububanyi n'amahanga y'Ubwongereza yongeyeho ko Uburusiya bwibasiye ibitangazamakuru byo mu Bwongereza, kompanyi z'itumanaho, ibikorwa-remezo by'ingufu z'amashanyarazi hamwe n'ibigo bya politike.

Mu itangazo yasohoye, Minisitiri Lammy yagize ati: "Kremlin ntiyagombye gushidikanya: turabibona ibyo barimo kugerageza gukorera ahihishe kandi ntituzabyihanganira."

"Uruvange rw'inkeke n'ubushotoranyi bya Putin ntibizigera na rimwe bihagarika ibyo twiyemeje."

BBC yasabye ambasade y'Uburusiya mu Bwongereza kugira icyo ibivugaho, kugeza ubu nta cyo yasubije.

Abantu cyangwa ibigo byafatiwe ibihano bashobora kubuzwa ibintu binyuranye, birimo no gufatira imitungo yabo y'amafaranga.

Abategetsi b'i Burayi barimo no gushaka ko Amerika yotsa ikindi gitutu Uburusiya.

Muri iki cyumweru, Perezida w'Amerika Donald Trump yakangishije gushyiraho imisoro ikaze ku bicuruzwa byinjira mu Burusiya niba amasezerano y'amahoro atagezweho mu minsi 50. Perezida w'Amerika arimo kurushaho kunanirwa kwihangana kuri Putin.

Minisiteri y'ububanyi n'amahanga y'Ubwongereza yanatangaje ibihano ku bategetsi batatu ba "African Initiative", ubukangurambaga bwo ku mbuga nkoranyambaga ivuga ko bwashinzwe, buhabwa amafaranga ndetse buhabwa abakozi n'Uburusiya, bugamije gukora ibikorwa byo gukwirakwiza amakuru atari ukuri ayobya muri Afurika y'uburengerazuba.

Mbere, Uburusiya bwahakanye kugira uruhare mu bikorwa byo kwivanga muri demokarasi y'ibihugu cyangwa gushaka kudurumbanya ubukungu bwabyo.