Sinagurisha Twitter ku mafaranga nayiguze – bimwe mu byo Musk yaganiriye na BBC

Mu kiganiro umukuru w'urubuga nkoranyambaga rwa Twitter yagiranye na BBC kuri uyu wa gatatu, yavuze ko kugura Twitter byatumye agira "uguhangayika".

Muri icyo kiganiro kitari cyitezwe yagiranye n'umunyamakuru wa BBC ku ikoranabuhanga ukorera muri Amerika, James Clayton, Musk yavuze ko kuba ibitangazamakuru bimwe byandika ibintu ku buzima bwe bwite "bikomeretsa".

Ni ikiganiro cyabereye ku cyicaro gikuru cya Twitter i San Francisco muri leta ya California. BBC yabonye ubutumire bwacyo habura gato ngo kibe.

Musk yemeye ko afitanye umubano "udasanzwe" n'ibitangazamakuru, avuga ko ari uw'"urukundo n'urwango, bishoboka ko urimo urwango rwinshi kurushaho". Kuri ibi yahise aseka.

Ati: "Ibitangazamakuru bishobora kunyandagaza mu buryo buhoraho muri Amerika no mu Bwongereza".

Yongeyeho ko mu bihugu bimwe "ibitangazamakuru ntibishobora kuvuga ibintu bidahwitse ku bantu bakomeye".

Yahise avuga ko atekereza ko kuba ibitangazamakuru bishobora kumuvugaho icyo bishatse ari byiza ku bwisanzure bw'itangazamakuru, aho we n'abandi "bantu bakomeye" na bo bashobora kwandikwaho muri ubwo buryo.

Musk yavuze ko "yubaha cyane BBC".

Abajijwe abantu amaze kwirukana kuva yagura Twitter, Musk yavuze ko ubwo yaguraga iyi kompanyi "yari munsi ya [abakozi] 8,000", none ubu ifite abakozi "1,500".

Mu kwezi kw'Ukwakira (10) mu 2022 ni bwo Musk yaguze Twitter kuri miliyari 44 z'amadolari y'Amerika.

Abajijwe niba bigoye kwirukana abantu benshi, Musk yagize ati: "Ntibiryoshye na gacye". Yongeyeho ko hari ubwo "bibabaza".

Yanemeye ko atirukana buri muntu ari we ubwe uhibereye abibwira umukozi.

Ati: "Ntibishoboka kuvugana n'abantu benshi gutyo amaso ku maso".

Wagurisha Twitter ku kiranguzo?

Musk yabajijwe niba ubu hagize umuha miliyari 44 z'amadolari yaguze Twitter yayimugurishaho.

Asubiza oya, ariko ahita asobanura ko yayigurisha abaye azi neza ko uwo ayigurishijeho afite umuhate wo kuvuga ukuri nkuko na Musk avuga ko afite uwo muhate.

Abajijwe impamvu yavuze ko azegura ku kuba umuyobozi mukuru wa Twitter, Musk yavuze ko yamaze kwegura kuri ubwo buyobozi ndetse ko ubu imbwa ye ari yo CEO wa Twitter. Aha na bwo yongeye guseka.

Umunyamakuru wacu yabajije Musk niba hari ikintu na kimwe yicuza ku kugura Twitter. Musk avuga ko "ikigero cy'ububabare kiri ku rwego rwo hejuru cyane, ibi ntibyabaye ibirori".

Yongeyeho ko byabaye "ibihe byo guhangayika cyane mu mezi menshi ashize", ariko yongeraho ko kugura iyi kompanyi ari cyo kintu cyari gikwiye.

Ati: "Ese habayeho amakosa menshi muri uru rugendo? Cyane rwose. Ariko ibyiza ni ibirangira neza, numva turimo kwerekeza ahantu heza".

'Rimwe na rimwe ndara mu biro'

Musk yabajijwe kandi ku bigo byamamaza kuri Twitter byahagaritse uko kuyamamazaho kuva Musk yayigura.

Yumvikanishije ko ubu abo bayamamazagaho bose bagarutse cyangwa bavuze ko bazagaruka, ariko nta kigo yavuze mu izina.

Zimwe muri kompanyi zaretse kwamamaza kuri Twitter mu mwaka ushize zirimo nka Volkswagen na General Motors.

BBC ntiyashoboye kugenzura ibyo Musk yavuze, birimo no kumenya niba ibigo byamamaza kuri Twitter birimo kugaruka.

Ni ikiganiro cyabayemo ugushyamirana ku kigero runaka hagati ya Musk n'umunyamakuru wacu, aho uyu mukuru wa Twitter yavuze ko na we arimo kubaza uyu munyamakuru nkuko na we yamubazaga.

Ubwo umunyamakuru wa BBC James Clayton yari ageze hagati amubaza, Musk yamuhagaritse ngo amwibutse ko "atakiri umukuru wa Twitter".

Amubajije umukuru wa Twitter uwo ari we, Musk yavuze izina ry'imbwa ye Floki, yo mu bwoko bw'imbwa z'impigi zitwa Shiba Inu, zikomoka mu Buyapani.

Abajijwe niba arara mu biro, Musk yagize ati: "Rimwe na rimwe ndara mu biro".

Yongeyeho ko hari ahantu ku ntebe y'imisego yo mu isomero "hatajya umuntu n'umwe".