Ubuyapani: Habonetse ibisigazwa bya kajugujugu ya gisirikare n'imirambo itanu

Abahanga mu kwibira mu mazi batahuye ibisigazwa by'indege ya kajugujugu ya gisirikare, hamwe n'imirambo y'abantu batanu mu bantu 10 bari bayirimo, mu gice cy'Ubuyapani gikora ku nyanja.

Iyo kajugujugu yo mu bwoko bwa UH60, inazwi nka Black Hawk, yaburiwe irengero kuri za 'screens' za radar hafi y'ikirwa (izinga mu Kirundi) cya Miyako ku wa kane w'icyumweru gishize.

Yari irimo kugenzura ako gace ubwo yaburirwaga irengero.

Ibisigazwa bireremba ku mazi byemezwa ko ari ibice by'iyo kajugujugu, byari byarabonetse mu gikorwa gikomeje cyo gushakisha no gukora ubutabazi.

Iyo kajuguju y'imipanga ine na moteri ebyiri itwara abasirikare, ikoreshwa n'igisirikare cy'ubwirinzi bwo ku butaka cy'Ubuyapani, yaburiwe irengero mbere gato ya saa kumi z'amanywa (16:00) ku isaha yaho, ku itariki ya 6 Mata (4), hejuru y'igice gikora ku nyanja muri perefegitura (intara) ya Okinawa.

Ibiro ntaramakuru Kyodo News byo mu Buyapani byatangaje ko iyo mirambo yatahuwe n'uwibira wayisanze ku ndiba y'inyanja.

Ibi biro ntaramakuru byanatangaje ko impamvu nyayo y'icyabiteye itazwi, ariko ko byibazwa ko yari impanuka.

Liyetona Jenerali Yuichi Sakamoto, wo mu gisirikare cy'ubwirinzi bwo ku butaka cy'Ubuyapani, kizwi nka Ground Self-Defence Force (GSDF), ni umwe mu bari bari muri iyo ndege.