Umusirikare w'Afurika y'Epfo yiciwe mu mirwano na M23 i Sake

Ingabo z'Afurika y'Epfo ziri mu butumwa muri Repubulika ya Demokarasi ya Congo bw'umuryango w'ubukungu w'Afurika y'Amajyepfo (SAMIDRC) zivuga ko umwe mu basirikare bazo yapfuye nyuma y'imirwano n'inyeshyamba za M23 zirwanya ubutegetsi bwa Congo.

Ingabo z'Afurika y'Epfo (SANDF) zivuga ko ku wa kane "zahuye na M23 i Sake" – umujyi uri mu ntera ya kilometero 25 mu burengerazuba bwa Goma, umurwa mukuru w'intara ya Kivu ya Ruguru – bararwana.

Imisozi ikikije Sake iriho ibirindiro bimwe na bimwe bya M23, mu gihe muri 'centre' ya Sake gusubira iburasirazuba werekeza Mubambiro na Goma hakigenzurwa n'ingabo za leta, ingabo za SADC n'abitwa Wazalendo.

Mu itangazo yasohoye ku wa gatanu, SANDF ivuga ko abasirikare 13 bayo bakomerekeye mu mirwano, naho undi umwe arakomereka bimuviramo urupfu. Ivuga ko abakomeretse bajyanwe kuvurirwa ku bitaro by'i Goma kandi ko barimo koroherwa.

Mu itangazo na yo yasohoye, M23 yemeje ko yarwanye n'ingabo za leta ya Congo (FARDC) n'abafatanyabikorwa bazo barimo na SAMIDRC n'ingabo z'u Burundi.

M23 yavuze ko imibare y'ibanze igaragaza ko abasivile 10 bishwe n'uruhande rwa leta, abandi benshi barakomereka. BBC Gahuzamiryango ntiyashoboye kubigenzura mu buryo bwigenga.

Yongeyeho ko yafashe imodoka ebyiri z'"umwanzi" zitwara abasirikare ku rugamba n'ikamyo ikoreshwa ku rugamba. SANDF ntiyemeje ko izo zafashwe ariko yavuze ko imodoka ebyiri zitwara abasirikare "zangiritse" mu mirwano.

M23 ntiyatangaje niba hari umurwanyi wayo wapfiriye mu mirwano cyangwa wakomeretse.

U Rwanda rushinjwa na DR Congo n'ibihugu byinshi byo mu burengerazuba bw'isi gufasha umutwe wa M23 urwanya ubutegetsi bwa Kinshasa, ikirego u Rwanda rwakomeje guhakana.

Leta y'u Rwanda ishinja leta ya DR Congo gukorana n'umutwe w'inyeshyamba z'Abanyarwanda za FDLR zikorera mu burasirazuba bwa DR Congo, zirimo bamwe bashinjwa kugira uruhare muri jenoside yabaye mu Rwanda mu 1994. Ubutegetsi bwa Kinshasa burabihakana.

Uwo musirikare wapfuye ku wa kane, abaye uwa kane w'Afurika y'Epfo utangajwe ko yapfiriye muri ubwo butumwa, bwatangiye mu Kuboza (12) kw'umwaka ushize.

Muri Mata (4), SADC yavuze ko umusirikare ukomoka muri Afurika y'Epfo yapfiriye mu bitaro aho yari amaze igihe gito arwariye.

Muri Gashyantare (2), abasirikare babiri b'Afurika y'Epfo bo mu butumwa bwa SAMIDRC biciwe mu gitero cy'ibisasu by'urwungikane mu ntara ya Kivu ya Ruguru.

Nyuma y'igihe utagaba ibitero, umutwe wa M23 wongeye kugaba ibitero ku gisirikare cya DR Congo kuva mu mpera y'umwaka wa 2021. Ubu ugenzura igice kinini cy'intara ya Kivu ya Ruguru mu burasirazuba bw'igihugu.