Venezuela yamaganye igikangisho cya Trump cyo gufunga ikirere cy'icyo gihugu

Leta ya Venezuela yasubizanyije uburakari itangazo rya Perezida w'Amerika Donald Trump rivuga ko ikirere gikikije Venezuela gikwiye gufatwa ko gifunzwe.

Minisiteri y'ububanyi n'amahanga ya Venezuela yavuze ko ayo magambo ya Trump ari "ubundi bushotoranyi bukabije cyane, bunyuranyije n'amategeko kandi budafite ishingiro bukozwe ku baturage ba Venezuela".

Amerika nta bubasha ifite bwo mu rwego rw'amategeko bwo gufunga ikirere cy'ikindi gihugu ndetse itangazo rya leta ya Venezuela ryashinje Trump kuyishyiraho "igikangisho cya gikoloni".

Amerika yongereye ingabo muri ako karere ndetse yagabye ibitero byo mu kirere nibura 21 ku mato ivuga ko yari atwaye ibiyobyabwenge, yica abantu barenga 80. Nta gihamya yatanze ndetse Perezida wa Venezuela Nicolás Maduro avuga ko ibi bikorwa by'Amerika ari igerageza ryo kumuhirika ku butegetsi.

Trump yanditse ku rubuga nkoranyambaga rwe Truth Social ati: "Kuri Kompanyi zose z'indege, Abapilote, Abacuruzi b'ibiyobyabwenge bya magendu, n'Abacuruzi ba magendu b'Abantu, nyabuneka mufate [ko] IKIRERE CYO HEJURU N'IGIKIKIJE VENEZUELA GIFUNZWE CYOSE UKO CYAKABAYE."

Ibiro bya Perezida w'Amerika (byitwa White House) ntibyahise bisubiza BBC ku busabe bwo kugira icyo bibivugaho.

Mu gihe Trump akomeje kongera ibikangisho bye, bamwe mu bo mu ishyaka ry'abademokarate, ritavuga rumwe n'ubutegetsi, n'abo mu ishyaka rye ry'abarepubulikani, bo mu nteko ishingamategeko, bagaragaje uburakari ku kuba atasabye uruhushya inteko ishingamategeko.

Ku cyumweru, Chuck Schumer, ukuriye abademokarate muri sena, yatangaje ku rubuga nkoranyambaga X ati: "Ibikorwa bitagize icyo byitayeho bya Trump byerekeza kuri Venezuela birimo kurushaho kwegereza cyane Amerika ku yindi ntambara ihenze yo mu mahanga."

"Mu itegekonshinga ryacu, inteko ishingamategeko ni yo yonyine ifite ububasha bwo gushoza intambara."

Marjorie Taylor Greene, Depite w'umurepubulikani, kugeza mu gihe cya vuba aha cyane gishize wari inshuti ya hafi ya Trump, yagize ati: "Ukwibutsa, inteko ishingamategeko ni yo yonyine ifite ububasha bwo gushoza intambara."

Trump atangaje ibi nyuma y'iminsi ikigo cya leta y'Amerika gishinzwe iby'indege (FAA) kiburiye kompanyi zo gutwara abantu mu ndege ko hari "ukwiyongera kw'igikorwa cya gisirikare muri Venezuela no mu nkengero yayo".

Ibyo byatumye kompanyi nyinshi zikomeye zo gutwara abantu mu ndege ziba zihagaritse ingendo aho hantu. Nuko Venezuela ihita izambura uburenganzira bwo guhagurukira no kugwa muri icyo gihugu.

Mu itangazo yasohoye ku wa gatandatu, minisiteri y'ububanyi n'amahanga ya Venezuela yashishikarije "amahanga, leta zifite ubusugire [zigenga] zo ku isi, UN [ONU], n'imiryango mpuzamahanga bireba kwamagana byivuye inyuma iki gikorwa kigayitse cy'ubushotoranyi".

Kuri uwo munsi, igisirikare cya Venezuela cyakoze imyitozo mu turere two ku nkombe y'inyanja. Televiziyo y'igihugu ya Venezuela yagaragaje amashusho y'intwaro zihanura indege n'amashusho agaragaza izindi ntwaro za rutura zari zirimo kugeragezwa.

Amerika yagabye ubwato bwayo bw'intambara bwa mbere bunini cyane ku isi bugwaho bukanahagurukirwaho n'indege z'intambara, bwitwa USS Gerald Ford, hamwe n'abasirikare hafi 15,000. Ubwo bwato n'abo basirikare yabohereje ahantu bashobora kurasa bari bakageza muri Venezuela.

Amerika yakomeje gushimangira ko uko kugaba ubwo bwato n'abasirikare – ba mbere benshi cyane Amerika yohereje muri ako karere kuva iteye Panama mu 1989 – kugamije kurwanya ubucuruzi bwa magendu bw'ibiyobyabwenge.

Ku wa kane, Trump yaburiye ko ibikorwa by'Amerika byo guhagarika ubucuruzi bwa magendu bw'ibiyobyabwenge bwo "ku butaka" bizatangira "vuba aha cyane".

Leta ya Venezuela yemeza ko intego y'Amerika ari iyo guhirika Perezida Maduro, wo mu murongo wa politike wo gushaka uburinganire mu mibereho. Mu mwaka ushize yatorewe indi manda, mu matora yamaganwe n'abatavuga rumwe n'ubutegetsi muri Venezuela, hamwe n'ibihugu byinshi, ko yabayemo uburiganya.