'Sinshobora kubyiyumvisha' – María Corina Machado watsindiye igihembo cy'amahoro cyitiriwe Nobel ahigitse Trump wagisabiwe

Uwatsindiye igihembo cy'amahoro cyitiriwe Nobel uyu mwaka ni María Corina Machado, Umunya-Venezuela w'impirimbanyi iharanira demokarasi.

Machado, umukuru w'abatavuga rumwe n'ubutegetsi muri Venezuela, amaze igihe ahanini ari mu bwihisho kuva habaye amatora ya perezida yo mu mwaka ushize.

Yahembewe "umurimo we udacogora mu guharanira uburenganzira bwa demokarasi ku baturage ba Venezuela" no ku bw'"urugamba rwe rwo kugera kuri demokarasi mu buryo buboneye kandi mu mahoro igasimbura ubutegetsi bw'igitugu".

Perezida Donald Trump w'Amerika ari mu bari basabiwe guhabwa iki gihembo, we ubwe yavugaga ko agikwiriye kubera ibikorwa byo kugarura amahoro ahatandukanye ku isi avuga ko yakoze.

Umukuru w'akanama gatanga iki gihembo yavuze ko Machado ari "umwe mu ngero zidasanzwe na busa z'ubutwari bwa gisivile ubayeho muri Amerika y'Amajyepfo mu bihe bya vuba aha bishize".

Amaze kumenya ko ari we uyu mwaka watsindiye icyo gihembo cy'amahoro cyitiriwe Nobel, María Corina Machado yavuze ko yumijwe n'ayo makuru.

Mu butumwa bwa videwo abo mu itsinda rye ryo gutangaza amakuru boherereje ibiro ntaramakuru AFP, Machado yabwiye Edmundo González - wamusimbuye nk'umukandida perezida ubwo we yari yabujijwe kwiyamamaza - ati: "Ndumiwe!"

González, umaze hafi umwaka ahunze, yasubije ati: "Twumijwe n'ibyishimo."

Machado, w'imyaka 58, uba mu bwihisho muri Venezuela, akomeza agira ati: "Ibi ni ibiki? Sinshobora kubyiyumvisha."

Iyo videwo yanatangajwe kuri konti ya González yo rubuga nkoranyambaga rwa X.

Perezida Trump yari yakoze ubukangurambaga muri rubanda ashaka gutsindira icyo gihembo, ariko kwakira abahatanira icyo gihembo byarangiye muri Mutarama (1) uyu mwaka - ubwo we yari atangiye manda ye ya kabiri nka Perezida w'Amerika.