Samia Suluhu Hassan yatangajwe ko yatsinze amatora ya perezida muri Tanzania n'amajwi 98%

Komisiyo y'amatora muri Tanzania yatangaje ko Samia Suluhu Hassan, wari usanzwe ari Perezida, ari we watsinze amatora ya perezida yabaye ku wa gatatu, n'amajwi hafi 98%.

Ubwo yakiraga icyemezo cy'intsinzi ye ku wa gatandatu, Samia, w'imyaka 65, yagize ati: "Turashimira abashinzwe umutekano batumye urugomo rudahagarika gutora.

"Leta yamaganye cyane ibikorwa by'urugomo byabaye. Ibi bintu byabaye ntibyari birimo gukunda igihugu habe na busa."

Mbere yaho mu gitondo cyo ku wa gatandatu, ubwo yatangazaga ibyavuye mu matora, umukuru wa komisiyo y'amatora Jacobs Mwambegele yavuze ko "Samia Suluhu Hassan yatsinze amatora ya perezida mu [ahagarariye] ishyaka rya Chama Cha Mapinduzi (CCM)".

Umukuru wa komisiyo y'amatora yavuze ko Samia yatowe n'abantu miliyoni hafi 31,9, bangana n'amajwi 97,66%, mu matora yitabiriwe ku kigero kigera hafi kuri 87% by'abantu miliyoni 37,6 biyandikishije gutora.

Amashyaka atavuga rumwe n'ubutegetsi yanze ibyavuye mu matora, avuga ko ibyabaye ari uguha inkwenene (gusebya) demokarasi kuko abakomeye bajyaga kuba barahatanye na Samia bari barafunzwe cyangwa bakangirwa kwiyamamaza.

Abakurikiraniye hafi amatora yo muri Tanzania bo mu mahanga bagaragaje impungenge bavuga ko batewe no kuba atarabaye mu mucyo, ndetse n'imvururu zabaye henshi mu gihugu, amakuru avuga ko ziciwemo abantu babarirwa mu magana, naho abandi babarirwa mu magana barakomereka.

Bijyanye n'ibi byatangajwe na komisiyo y'amatora, Perezida Samia agiye gutegeka Tanzania kuri manda ya kabiri y'imyaka itanu.

Imyigaragambyo yarakomeje ku wa gatanu, ubwo abigaragambya biganjemo urubyiruko bamaganaga amatora bavuga ko afifitse.

Ishyaka rya Chama Cha Mapinduzi (CCM), Samia arimo, rimaze imyaka hafi 50 ku butegetsi. Ryari risanzwe ryitezwe na benshi gutsinda amatora n'amajwi menshi cyane.

Abatavuga rumwe n'ubutegetsi bakomeye bajyaga guhatana na we bya nyabyo, umwe yarafunzwe aregwa ubugambanyi, ikirego ahakana, undi yangirwa kwiyamamaza ku mpamvu za tekinike zishingiye ku mategeko.

Ibyo byatumye amashyaka atavuga rumwe n'ubutegetsi ashinja leta kubangamira demokarasi, ibyo leta ihakana.

Amashyaka mato cyane 16 – muri yose nta na rimwe rifite amateka yo gushyigikirwa cyane n'abaturage – ni yo yemerewe guhatana na CCM.

Aya matora yaranzwemo imyigaragambyo irimo urugomo mu bice binyuranye bya Tanzania guhera ku munsi w'amatora wo ku wa gatatu.

Ishyaka rya mbere rikomeye ritavuga rumwe n'ubutegetsi rya CHADEMA, ryavuze ko abantu "bagera kuri 700" biciwe mu gukozanyaho n'abashinzwe umutekano. Umudipolomate ukorera muri Tanzania yabwiye BBC ko hari ibimenyetso byo kwizerwa byuko abantu nibura 500 bapfuye.

Mu birwa bya Zanzibar bifite ubwigenge bucagase – bitora leta yabyo bwite na perezida wabyo bwite – Hussein Mwinyi, wa CCM, ari na we Perezida uri ku butegetsi, yatsinze amatora n'amajwi hafi 80%.

Ibiro ntaramakuru AP byatangaje ko abatavuga rumwe n'ubutegetsi muri Zanzibar bavuze ko habaye "uburiganya bwinshi cyane" mu matora yaho.

Perezida Samia yageze ku butegetsi mu mwaka wa 2021 nka Perezida wa Tanzania wa mbere w'umugore, nyuma y'urupfu rw'uwo yasimbuye Perezida John Magufuli, yari abereye Visi Perezida.

Mu ntangiriro, Samia yashimiwe kudohora ikandamiza ryo muri politike, ariko kuva icyo gihe urubuga rwa politike rwarafunganye. Ubutegetsi bwe bushinjwa kwibasira ababunenga bubinyujije mu kubata muri yombi no kubashimuta.