Gen Peter Cirimwami: Amezi arindwi nyuma yo kwicwa arasiwe i Sake hafi ya Goma yashyinguwe i Kinshasa

Jenerali-Majoro Peter Cirimwami Nkuba wahoze ari guverineri w'intara ya Kivu y'Epfo wishwe arasiwe i Sake mu burengerazuba bw'umujyi wa Goma tariki 24 Mutarama(1) 2025 yasezewehomu cyubahiro mu nteko ishingamategeko ya DR Congo mbere yo gushyingurwa mu irimbi rishya rya gisirikare i Kinshasa.

Imbere ya Perezida Félix Tshisekedi, Minisitiri w'ingabo n'abasirikare bakuru, muri uyu muhango, isanduku iriho ifoto ya Cirimwami yari iri kumwe n'indi iriho ifoto ya Colonel Rugabisha Alexis wiciwe ku rugamba tariki 01 Gashyantare (2) 2025 i Nyabibwe mu ntara ya Kivu y'Epfo.

Aba bombi bapfuye ubwo intambara y'ingabo za leta n'umutwe wa M23 yari igeze ahakomeye mu ntara za Kivu ya Ruguru na Kivu y'Epfo. Nyuma y'iminsi micye Cirimwami yishwe, umutwe wa M23 wahise ufata umujyi wa Goma.

Mu butumwa bwashyizwe ku rubuga X, igisirikare cya FARDC cyavuze ko aba bombi ari "intwari zahagaze zishikamye ku rugamba, zitanga ubuzima bwazo mu kurengera igihugu n'ubusugire bw'abaturage ba Congo".

Jenerali-Majoro Cirimwami yishwe arasiwe ahitwa Kasengezi hafi ya Sake ubwo yari yasuye urugerero rw'ingabo za leta muri aka gace kari kamaze amezi karabaye isibaniro ry'urugamba na M23.

Urupfu rwe ntirwavuzweho rumwe, mu gihe igisirikare cyatangaje ko "yishwe n'umwanzi", bamwe mu bo mu muryango we bavuze ko "yarashwe n'abo ku ruhande rwe".

Mu kumusezeraho, Perezida Tshisekedi yavuze ko Cirimwami "yabayeho kandi arwana nk'umusirikare, yapfuye nk'umusirikare, ari gusohoza inshingano z'ikirenga".

Colonel Rugabisha we yiciwe mu mirwano ikomeye yabereye mu gace ka Nyabibwe muri teritwari ya Kalehe, ubwo inyeshyamba za M23, nyuma yo gufata Goma, zarimo zimanuka zerekeza i Bukavu.

Icyo gihe bamwe mu batanze amakuru ku rupfu rwe bavuze ko ubwo urugamba rwari ruhinanye i Nyabibwe, benshi mu basirikare ba Col Rugabisha wari komanda wa Brigade ya 12 bahunze agasigarana n'abasirikare bacye ku murongo wa mbere w'urugamba aho yarashwe amasasu menshi mu gatuza akagwa aho.

Mu ijambo ryo kumusezera, Tshisekedi yavuze ko Rugabisha yari mu ngabo "zikomeza urugamba mu gutuza no kutagamburuzwa".

Perezida Tshisekedi, nk'uko bivugwa n'ibiro bye, yavuze ko bazakomeza gukurikirana "abagize uruhare bose, abari inyuma n'abafashije ikorwa ry'ibyaha ku baturage bacu", yongeraho ati: "Tuzubaha abacu bapfuye dukora mu guhozaho, ikinyabupfura no kubahiriza inshingano".

Bazamuwe mu mapeti batakiriho

Muri uyu muhango, aba basirikare bombi bashyizwe mu rwego rw'intwari za DR Congo ruzwi nka "Héros nationaux Kabila-Lumumba", nk'uko bivugwa n'ibiro bya perezida w'igihugu.

Cirimwami wo mu bwoko bw'Abashi muri Kivu y'Epfo na Rugabisha wo mu bwoko bw'Abanyamulenge na we wo muri iyo ntara, kuri uyu munsi wo gushyingurwa kwabo bazamuwe mu mapeti.

Ibiro bya perezida wa Congo bivuga ko Cirimwami yahawe ipeti rya Lieutenant-général naho Rubabisha wahoze ari Colonel agahabwa ipeti rya Général de brigade.

Aba basirikare bashyinguwe mu irimbi rishya rya gisirikare, ryafunguwe kuri uyu wa mbere na Perezida Tshisekedi, ryitwa "Repos du soldat", riri muri Komine N'sele i Kinshasa.

Iri rimbi rifite hegitari 74 rizajya rishyingurwamo abasirikare n'abandi bategetsi bakuru "bakoreye igihugu", ubu ni ryo rimbi rusange rinini muri Kinshasa, nk'uko bivugwa n'ibiro bya perezida wa DR Congo.