Bimwe kuri Gén-maj Peter Cirimwami Nkuba wagizwe guverineri wa Kivu ya Ruguru

Général-major Peter Cirimwami Nkuba yagizwe guverineri wa gisirikare w’agateganyo w’Intara ya Kivu ya ruguru ya DR Congo, itegetswe n’igisirikare kuva mu 2021.

Itangazo ryo muri 'weekend' ishize ryashyizwe ku mugaragaro mu ijoro ryo kuwa mbere rivuga ko ari icyemezo cya Perezida Félix Tshisekedi, umugaba w’ikirenga w’ingabo za RDC.

Gén-maj Cirimwami asimbuye Lt Gen Constant Ndima uherutse gutumizwa i Kinshasa gusobanura iby’ubwicanyi bwakozwe n’abasirikare bo mu mutwe urinda perezida, ku basivile barenga 50 b’itsinda ryitwa Wazalendo, mu mujyi wa Goma mu mpera z’ukwezi gushize.

Aba bishwe bashyinguwe ejo kuwa mbere, mu gihe urubanza rwa bamwe mu basirikare bashinjwa uruhare mu kubica rukomeje.

Intara ya Kivu ya Ruguru, n’iya Ituri, zimaze imyaka zugarijwen’ibibazo by’umutekano mucye ukomoka ku mitwe y’inyeshyamba, ibyatumye leta ifata umwanzuro wo kuvanaho ubutegetsi bwa gisivile muri izi ntara hagashyirwa ubutegetsi bwa gisirikare hagamijwe kurandura iyo mitwe.

Gen Cirimwami ni nde?

Ibinyamakuru muri RDC bivuga ko Jenerali Cirimwami ari umusirikare ukomoka mu ntara ya Kivu y’Epfo mu bwoko bw’Abashi, wamaze igihe kinini akorera mu burasirazuba bw’iki gihugu.

Cirimwami yavuzwe cyane mu itangazamakuru muri Mata (4) 2022 ubwo yagirwaga umukuru w’ibikorwa bya gisirikare byo kurwanya inyeshyamba mu ntara za Kivu y’Epfo na Kivu ya Ruguru bizwi nka Sokola II.

Hari hashize igihe gito imirwano y’ingabo za leta n’umutwe wa M23 yubuye.

Itangazo rya ministeri y’ingabo rimushyira muri uwo mwanya icyo gihe ryashinje uwo yasimbuye - Brigadier Général Évariste Mwehu Lungu – kunanirwa guhashya M23.

Cirimwami amaze gufata izo nshingano, byagiye bivugwa n’ibinyamakuru ko ubwe yajyaga ku rugamba kuyobora ingabo zirwana na M23 aho rwari ruhinanye muri teritwari ya Rutshuru.

Mu mirwano ikomeye yo muri Kamena(6) 2022, inyeshyamba za M23 zafashe umujyi wa Bunagana uri ku mupaka na Uganda ziwirukanamo ingabo za leta.

Itangazo rya minisiteri y’ingabo za DR Congo muri iyo minsi ryamenyesheje ko bapfushije Major Eric Kiraku Mwisa wari ushinzwe umutekano bwite wa Gen Cirimwami wari ukuriye ingabo ziri kuri uru rugamba.

Nyuma y’aha, ubutegetsi bwa DR Congo bwahamagaje Cirimwami i Kinshasa kubera uko kunanirwa, mu kwezi kwa Nyakanga(7) uwo mwaka yahise agirwa komanda w’akarere ka gisirikare ka Ituri.

Cirimwami agiye kuyobora iyi ntara mu gihe ubu hari agahenge kamaze amezi arenga atandatu hagati y’inyeshyamba za M23 n’ingabo za leta, nubwo abasesenguzi bamwe bavuga ko ikibazo kitararangira.

Arayobora intara kandi aho abarenga 30% by'abayituye bavuye mu byabo bahunga ibikorwa by’imitwe y'inyeshyamba, mu gihe kandi bitegura amatora ya perezida ateganyijwe mu Ukuboza(12) uyu mwaka.