Uganda: Abagore babiri bafunzwe bashinjwa gusomana mu ruhame

Igipolisi cya Uganda cyafunze abagore babiri, bombi bari mu myaka 20, nyuma y'uko abaturanyi babo bavuze ko bababonye barimo gusomanira mu ruhame, igikorwa gihanwa n'itegeko rirwanya ubutinganya muri iki gihugu.

Mu itangazo ryo ku wa kabiri, igipolisi cyavuze ko abo bagore bafunzwe ku wa gatatu ushize tariki 18 Gashyantare mu mujyi wa Arua mu majyaruguru ya Uganda.

Abategetsi bavuze ko abaturanyi bafotoye abo bagore mbere yo kubibwira polisi.

Abo bagore bakomeje gufungwa badafite abunganizi mu mategeko, nk'uko ibiro ntaramakuru AFP bibivuga.

Amategeko ya Uganda ateganya ibihano bikomeye, birimo no gufungwa burundu, ku guhuza ibitsina mwembi muri abagabo cyangwa mwembi muri abagore, ndetse n'igihano cy'urupfu mu gihe "icyaha nk'iki gikomeye".

Polisi yabwiwe n'abaturanyi ko babonye abo bagore barimo gusomana, nk'uko AFP ibivuga.

Josephine Angucia Umuvugizi w'igipolisi cyaho yabwiye AFP ati: "Abaturanyi bahamagaye polisi binubira ko bariho bakora ubutinganyi kandi babikoreraga mu ruhame bose babareba".

Yongeraho ko bahaye polisi amashusho bavuga ko ari ayo bafashwe barimo gusomanira mu ruhame.

Angucia yongeraho ko abaturage bavuze ko babonye amatsinda y'abagore aza gusura aba bombi basanzwe babana mu nzu y'icyumba kimwe kandi bakaharara, bakavuga ko ari ibikorane by'abahuje igitsina.

Angucia avuga ko ikirego kuri aba bagore cyashyikirijwe abashinjacyaha ngo basuzume niba cyaregerwa inkiko.

Police ishinja abo bagore imyifatire y'abatinganyi kandi ko babana kuva mu mwaka ushize.

Itegeko rihana ubutinganyi muri Uganda ni rimwe mu akarishye kurusha ayandi ku isi.

Uwo bihamye ashobora gufungwa burundu mu gihe yabikoze ku bushake, naho mu gihe ari ikirego "gikomeye", kirimo nko kubikora kenshi, kubikoresha abana cyangwa abanyantege nke, uwabikoze ashobora guhanishwa urupfu.

Iri tegeko ryamaganywe na leta z'ibihugu by'iburengerazuba n'amashyirahamwe aharanira uburenganzira bwa muntu.

Impirimbanyi y'uburenganzira Frank Mugisha yanenze ifungwa ry'abo bagore avuga ko bigaragaza akaga ba LGBT+ bashobora guhura na ko muri Uganda.

Yaburiye ko iryo tegeko ryatumye haba ibikorwa byo gutera ubwoba no kwambura abantu ibyabo ku iterabwoba, aho ababikorerwa benshi batinya gukurikiranwa no gusaba ubufasha.

Uganda ni igihugu gituwe ahanini n'abaturage b'ukwemera kwa gikristu.

Iryo tegeko rikarishye ku bashinjwa ibikorwa by'ubutinganyi, ryamaganywe kandi na ONU, ryatangiye kujya mu ngiro mu 2023.

Banki y'isi yahagaritse by'agateganyo inguzanyo kuri Uganda kubera iri tegeko mbere y'uko yongera kuzisubizaho mu 2025.

Bimwe mu bihugu muri Afurika na byo byashyizeho amategeko akomeye ku muryango wa LGBT mu myaka ya vuba.

Muri Nzeri umwaka ushize, inteko y'inzibacyuho ya Burkina Faso yemeje itegeko ribuza ubutinganyi, ikurikira umuturanyi wayo Mali mu 2024.