Umuvugizi wa gisirikare wa M23 yiciwe mu gitero cya 'drone' cy'ingabo za leta – ibivugwa n'abategetsi

Umuvugizi wa gisirikare w'umutwe w'inyeshyamba wa AFC/M23, Lt Col Willy Ngoma, yiciwe mu gitero cy'indege nto z'intambara zitajyamo umupilote (drone) cy'ingabo za leta mu burasirazuba bwa Repubulika ya Demokarasi ya Congo (DRC) mu rukerera rwo kuri uyu wa kabiri, nkuko bitangazwa n'ibiro ntaramakuru Reuters.

Reuters yasubiyemo amagambo y'umudipolomate wo mu karere, umutegetsi mukuru wo mu nyeshyamba n'umujyanama wa leta ya DRC wo mu burengerazuba bw'isi.

BBC News Gahuzamiryango yagerageje kuvugana na M23 n'ingabo za DRC (FARDC), kugeza ubu ntibirashoboka. Nta cyo leta ya DRC yahise itangaza ku mugaragaro ku gitero cyiciwemo Lt Col Ngoma.

Ibi bibaye mu gihe ibikorwa by'agahenge bigirwamo uruhare na Qatar bikomeje, aho Kinshasa na M23 byasinye amasezerano i Doha yo gushyiraho uburyo buhuriweho bwo kugenzura agahenge, burimo indorerezi za Qatar, Amerika n'umuryango w'Ubumwe bw'Afurika (AU).

Umuryango w'Abibumbye (ONU), DRC n'ibihugu byinshi byo mu burengerazuba bishinja u Rwanda gufasha umutwe wa M23, ugenzura ibice byinshi byo mu ntara ya Kivu ya Ruguru no mu ntara ya Kivu y'Epfo, birimo n'imijyi ya Goma na Bukavu.

U Rwanda ruhakana gufasha M23, rukavuga gusa ko rwashyizeho "ingamba z'ubwirinzi".

Iki gitero cyabereye hafi y'i Rubaya, mu ntara ya Kivu ya Ruguru, ahagana mu ma saa cyenda z'ijoro, nkuko Reuters ibitangaza.

Kibaye nyuma y'iminsi havugwa ibitero bya 'drone' muri ako gace, M23 ikabishinja FARDC. FARDC irabihakana.

Rubaya ni agace karimo ikirombe cy'amabuye y'agaciro cya Rubaya, gicukurwamo hafi 15% bya coltan icyenerwa ku isi.