Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
North Korea yarashe za 'missile ballistic' hashize amasaha Joe Biden avuye muri Aziya
Korea ya ruguru yarashe mu kirere za misile ziraswa kure cyane eshatu mu gitondo cya kare kuwa gatatu, nk'uko igisirikare cya Korea y'Epfo kibivuga.
Abategetsi b'i Seoul bavuga ko izi misile zarashwe mu kirere mu gace kegereye Pyongyang.
Bibaye nyuma y'uko kuwa kabiri Perezida Joe Biden wa Amerika avuye muri ako karere, mu ruzinduko yavugiyemo ko agomba guca intege Korea ya ruguru.
Kuva mu ntangiriro z'uyu mwaka, iki gihugu cyakomeje kurasa mu kugerageza za misile ziraswa kure cyane.
Ubuyapani bwemeje ko nibura uyu munsi harashwe ebyiri kandi buvuga ko hashobora kuba hari n'izindi nyinshi zarashwe.
Nobuo Kishi, ministiri w'ingabo w'Ubuyapani, avuga ko misile imwe yagurutse kugera ku ntera ya 550Km mu kirere naho indi ikagera kuri 750Km.
Kishi yanenze ibi bikorwa yita ko "bitakwihanganirwa" yongeraho ko "bishyira mu kaga amahoro n'umutekano w'Ubuyapani n'umuryango mpuzamahanga".
Mu nama y'igihugu y'umutekano ya Korea y'Epfo yahise iterana, icyo gikorwa bakise "ubushotoranyi bukabije", nk'uko ibiro bya perezida waho bibivuga.
Ibi bisasu byarashwe hashize amasaha Joe Biden ahagurutse asubira muri Amerika nyuma y'uruzinduko rw'iminsi itanu mu Buyapani na Korea y'Epfo.
Mbere yabyo, intasi muri Korea y'Epfo na Amerika zari zaburiye ko Korea ya ruguru yiteguye kurasa byo gusuzuma intwaro, kandi bishobora kuba no hagati mu ruzinduko rwa Biden.
Ari i Seoul, Biden na mugenzi we Yoon Suk-yeol bemeranyijwe ko ibihugu byombi bikorana imyitozo minini kurushaho ya gisirikare, no kohereza ibikoresho bya Amerika niba bikenewe guca intege igerageza ry'intwaro rya Pyongyang.
Biden yavuze ko Amerika "yiteguye ku kintu cyose Korea ya ruguru yakora".
Missile mu bihe 'bidasanzwe' bya Covid
Uku kurasa ibisasu kubaye mu gihe Korea ya ruguru irimo no guhangana n'icyorezo bikekwa ko ari Covid iri mu baturage.
Abarenga miliyoni imwe barwaye ibyo Pyongyang yise "umuriro" (fièvre/fever), kandi abarenga 68 bishwe nawo kuva mu mpera za Mata (4).
Perezida Kim Jong-un aheruka kuvuga ko iyi ndwara ari icyorezo gikomeye.
Tariki 12 z'uku kwezi, Korea ya ruguru yarashe mu igerageza za misile ziraswa kure cyane kuri uwo munsi nyine Kim yari yatangaje "ibihe bidasanzwe" kubera Covid.
Korea y'epfo yavuze ko yagennye inkunga y'ubutabazi ku muturanyi, ariko Pyongyang ntacyo irasubiza kuri icyo.
