Impamvu Vladimir Putin yaba ataratoje abarwanyi muri Africa nk'uko bivugwa ku ifoto yakwiriye henshi

Ifoto ya cyera imaze iminsi ikwirakwizwa na bamwe bavuga ko yerekana Perezida Vladimir Putin ari muri Africa y'amajyepfo atoza impirimbanyi z'ubwigenge, ariko ibyo si ukuri.

Yakoreshejwe nka bamwe mu gusobanura impamvu Africa ikwiye gushyigikira intambara y'Uburusiya kuri Ukraine.

Iyo foto yatangajwe kandi kuri Twitter na Lt Gen Muhoozi Kainerugaba umuhungu wa mbere wa perezida wa Uganda Yoweri Museveni.

Ariko ntabwo yerekana Putin ari muri Africa, kandi igihe abantu bavuga ko yafatiwe ntabwo ari cyo.

Putin ntabwo yari muri Tanzania

Iyi foto yakwirakwijwe cyane kuri internet nyuma y'uko itangajwe na blog yo muri Zimbabwe mu mpera za 2018.

Iyo blog ivuga ko iriho Putin ari mu kigo cy'imyitozo muri Tanzania mu 1973 atoza abaharaniraga ubwigenge.

Abandi bavuga ko bari muri iyi foto barimo uwaje kuba perezida wa Mozambique Samora Machel na Emmerson Mnangagwa, perezida wa Zimbabwe ubu.

Iyo blog igira iti: "Putin yabaye muri Tanzania imyaka ine atoza abarwanyi b'ubwigenge kuva mu 1973 kugeza mu 1977".

Ariko nta gihamya, yaba mu bushyinguranyandiko muri Africa cyangwa mu Burusiya, cyerekana ko Putin wavutse mu 1952 yari muri Africa mu myaka ya 1970.

Umwirondoro wa Putin ku rubuga rwa Kremlin werekana ko muri icyo gihe yigaga kuri kaminuza ya Leningrad State University aho yarangije mu 1975.

Paul Fauvet, umunyamakuru wabaye muri Mozambique imyaka ibarirwa muri za mirongo ati: "Ibivugwa [kuri iriya foto] biteye isoni gusa"

Imyitozo yahawe abaharaniraga ubwigenge muri Mozambique muri Tanzania avuga ko yari "iyobowe n'abatoza b'abashinwa ntabwo ari abasoviyeti."

Kandi, Mnangagwa ntabwo yari kuba ari muri Tanzania mu 1973 kuko yafashwe mu 1965 afungwa imyaka 10 na leta y'abategetsi b'abazungu mu cyari Southern Rhodesia icyo gihe.

Abarusiya basura Mozambique muri za 1980?

Umwanditsi Renato Matusse wo muri Mozambique yakoresheje iyi foto mu gitabo cye yasohoye mu 2018 aho avuga ko iriho Samora Machel n'abajyanama mu bya gisirikare b'abarusiya bariho batembera mu kigo cya gisirikare i Maputo muri Mozambique hagati mu myaka ya za 1980.

Ariko avuga neza ko Putin atari muri iyi foto.

Putin yari intasi ya KGB mu gihugu kitwaga East Germany hagati ya 1985 na 1990 kandi mbere yaho yari umu-ofisiye muto, bituma amahirwe menshi ari uko atari umuntu wayobora itsinda nka ririya ry'abarusiya basuye Mozambique.

Nta hantu Kremlin ivuga ko Putin yigeze asura Mozambique, cyangwa se aho byaba biri mu nyandiko ku buzima bwe.

José Milhazes, umunyamateka akaba n'umunyamakuru, avuga ko umuntu uri kuri iriya foto yaba ari undi musirikare mukuru w'umusoviyeti wakoreraga muri Africa y'amajyepfo.

Ati: "Naho kuba basa [na Putin], navuga gusa ko ibyo ari uruhurirane gusa."

Georgi Derluguian, wakoze nk'umusemuzi w'Ikirusiya n'Igiportugal mu myaka ya 1980, ubu ni umwalimu muri New York University Abu Dhabi, avuga ko ibivugwa ko ari Putin muri iriya foto ari "ugusetsa".

Avuga ko inkweto yambaye zerekana ko ari umusirikare, mu gihe Putin icyo gihe yari intasi. Kandi ko uboneka muri iriya foto yaba ari Putin ukuze kurusha imyaka yari afite icyo gihe.

Akandi kantu gato ko kongera kuri iki kibazo. Uyu mugabo utazwi kugeza ubu kuri iriya foto yambaye isaha ku kaboko k'imoso. Putin we - nibura muri iki gihe - azwiho kuyambara iburyo.