Rayan: Abakora ubutabazi muri Morocco bari hafi kugera ku muhungu umaze iminsi yaraheze mu kinogo

Abakora ibikorwa by'ubutabazi muri Maroc bagerageza kugera ku mwana w'umuhungu w'imyaka itanu waguye mu kinogo (umwobo) cy'iriba kirekire mu majyaruguru y'iki gihugu, barimo kwinjira mu byiciro bya nyuma by'iki gikorwa.

Uwo mwana, wavuzwe mu bitangazamakuru byaho ko yitwa Rayan, yaguye muri icyo kinogo mu minsi ine ishize ubwo yari arimo gukinira hafi yacyo, mu mujyi wa Tamorot uri mu ntera ya kilometero 100 uvuye mu mujyi wa Chefchaouen.

Abakora ubutabazi bavuze ko bageze mu muhora uri mu ntera ya metero itageze kuri imwe uvuye kuri uwo muhungu.

Ariko ubwoba bwuko hashobora kuba inkangu (kuriduka kw'ubutaka) bwatumye iki gikorwa kigorana. Umwe mu bakora ubutabazi yavuze ko atazi niba Rayan akiri muzima.

Abdelhadi Tamrani, ukuriye abakora ibikorwa by'ubutabazi, yabwiye ibiro ntaramakuru AFP ko kamera (camera) yamwerekanye imuturutse mu mugongo aryamiye urubavu.

Yabwiye televiziyo yo muri Maroc ati: "Ntibishoboka na busa kumenya uko umwana ameze muri iki gihe. Ariko twizeye Imana ko umwana ari muzima".

Amashusho yo ku wa kane yafashwe na kamera yamanuwemo, yerekanye ko uwo muhungu yari muzima kandi agifite ubwenge, nubwo yasaga nk'uwagize ibikomere bito ku mutwe.

Abakora mu bikorwa by'ubutabazi bamanuyemo icyo kumufasha guhumeka kirimo umwuka wa oxygen (oxygen mask), ibiryo n'amazi, ndetse hari n'itsinda ry'abaganga ahari kubera ibyo bikorwa by'ubutabazi, ryiteguye kuvura uwo muhungu. Indege ya kajugujugu na yo yamaze kuhagera ngo imujyane ku bitaro igihe yaba amaze gukurwa muri icyo kinogo.

Byemezwa ko yaguye mu ntera ya metero hafi 32 muri icyo kinogo gifunganye.

Imodoka za tingatinga zakoreshejwe mu guca umuhora (umuyoboro) iruhande rw'icyo kinogo.

Igihe uwo muhora wari umaze kugira ubujyakuzimu (uburebure) bureshya n'ubw'icyo kinogo, abo bari mu bikorwa by'ubutabazi batangiye gucukura batambika ngo bagere kuri uwo muhungu.

Ku wa gatanu nyuma ya saa sita z'amanywa, Abdesalam Makoudi, umwe mu bakuriye ibyo bikorwa, yagize ati: "Turi hafi kuhagera".

"Tumaze iminsi itatu dukora ubutaruhuka none umunaniro utangiye kutugeramo, ariko itsinda ryose ry'ubutabazi riracyakomeje umutsi".

Ibikorwa by'ubutabazi - biyobowe n'urwego rwa Maroc rw'ubutabazi bwa gisivile - byatangiye ku wa kabiri nimugoroba, hakoreshejwe amatara abonesha ahantu hanini kugira ngo bashobore gukora mu mwijima.

Imihanda yerekeza uri uwo mu mujyi wo muri iki gihugu cyo muri Afurika y'amajyaruguru yuzuyemo imodoka, mu gihe abantu babarirwa mu bihumbi barimo kubwira abakora ibikorwa by'ubutabazi ngo bakomereze aho.

'Sindasinzira na gato'

Se wa Rayan yari arimo gusana icyo kinogo cy'iriba ubwo iyo mpanuka yabaga. Yavuze ko we na nyina wa Rayan "bababaye bikomeye kandi bahangayitse cyane".

Ku wa gatatu, yabwiye urubuga rw'amakuru Le360 ati: "Muri ako kanya kamwe namukuyeho amaso, umwana yaguye mu kinogo. Sindasinzira na gato".

Aganira n'ibitangazamakuru byo muri Maroc, amarira amubunze mu maso, nyina wa Rayan yagize ati: "Umuryango wose wagiye kumushaka. Nuko tubona ko yaguye hasi mu iriba. Ndacyafite icyizere ko tuzamukuramo ari muzima".

Abantu babarirwa mu bihumbi bakomeje kureba ku mbuga nkoranyambaga amashusho y'ibikorwa by'ubutabazi, ndetse hari n'itsinda rinini ry'abantu bateraniye aho bibera barimo gushungera.

Ku mbuga nkoranyambaga muri Maroc, intero (hashtag) #SauveRayan (rokora Rayan) ikomeje gukoreshwa cyane, mu gihe abantu babarirwa mu bihumbi bakurikiranye amakuru mashya atangwa n'ibitangazamakuru ndetse n'atangwa n'abari aho ibikorwa by'ubutabazi birimo kubera.

Mohamed Yassin El Quahabi, ukuriye ishyirahamwe ry'abakora ibikorwa by'ubutabazi mu misozi no mu buvumo (cave) bo mu mujyi wa Chefchaouen, ari mu barimo gufasha mu butabazi. Yabwiye BBC ko kuba icyo kinogo gifunganye byagoye ibikorwa by'ubutabazi.

Yongeyeho ko uburyo bwinshi bwageragejwe n'abakorerabushake bo muri ako gace n'abakora mu bikorwa by'ubutabazi, bwo kugerageza kwinjirira aho ikinogo gitangirira hejuru, bwamaze kubananira.

Bwana El Quahabi yagize ati: "Ikibazo cy'ubu butabazi ni uko umurambararo w'ikinogo ari muto cyane, hafi santimetero 25".

"Mu bujyakuzimu bwa metero 28 warushijeho kuba muto cyane nuko ntitwashobora kumugeraho".

Umwe mu bari mu itsinda ry'ubutabazi yagize ati: "Uko turushaho kwegera, umwobo urushaho gufungana [kuba muto] no kugorana kuwunyuramo - bigatuma bigorana cyane kurokora umwana bikozwe n'abakorerabushake. Ni yo mpamvu twigiriye inama yo gukoresha ubundi buryo - ari bwo bwo gucukura".

Ariko abategetsi baracyahangayitse ko hagize ikintu cyivanga muri icyo kinogo gishobora gukomeretsa by'impanuka uwo mwana w'imyaka itanu, kubera igitaka gishobora kuriduka kikamugwaho.