Ethiopia yirukanye abadipolomate bane ba Ireland

Leta ya Ethiopia yirukanye abadipolomate bane ba Ireland kubera aho iki gihugu gihagaze ku kibazo cy'intambara ikomeje kuba muri Ethiopia.

Abo badipolomate bane bahawe igihe cy'icyumweru kimwe ngo babe bamaze kuva ku butaka bwa Ethiopia, nkuko Minisitiri w'ububanyi n'amahanga wa Ireland Simon Coveney yabivuze mu itangazo yasohoye.

Ariko ambasaderi wa Ireland muri Ethiopia hamwe n'undi mukozi umwe wo mu bakozi ba ambasade bemerewe kuhaguma.

Minisitiri w'ububanyi n'amahanga wa Ireland yavuze ko abategetsi ba Ethiopia basobanuye ko kwirukana abo badipolomate bitewe n'aho Ireland ihagaze ku kibazo cy'intambara muri Ethiopia no ku makuba ashingiye ku mibereho yatumye ubu abaturage babarirwa muri za miliyoni bacyeneye imfashanyo yihutirwa y'ibiribwa.

Yavuze ko ababajwe n'icyo cyemezo ariko avuga ko ambasade izakomeza gukora.

Ireland ifite ambasade muri Ethiopia kuva mu mwaka wa 1994.

Icyo gihugu, gifite umwanya udahoraho mu kanama k'umutekano k'umuryango w'abibumbye (ONU/UN), kimaze igihe kizamura ijwi cyane mu mahanga cyamagana ubwicanyi ndengakamere bivugwa ko bwakozwe n'impande zombi ziri muri iyi ntambara imaze umwaka umwe.

Abakozi benshi ba ONU birukanwe muri Ethiopia mu kwezi kwa cyenda, mu gihe abandi batari munsi ya batanu bagifunzwe. Nta mpamvu yatanzwe yatumye bafungwa.

Bibaye mu gihe ibihugu bikomeje kwiyongera - birimo Ubwongereza n'Amerika - mu gusaba abaturage babyo bari muri Ethiopia kuhava aka kanya, nyuma yuko imirwano ikajije umurego.

Inyeshyamba zo mu mutwe wa Tigray People's Liberation Front (TPLF), hamwe n'indi mitwe yitwaje intwaro yishyize hamwe na wo, zivuga ko zirimo gutera intambwe zerekeza ku murwa mukuru Addis Ababa.

Muri iki cyumweru, inyeshyamba zavuze ko zigaruriye umujyi wa Shewa Robit, uri ku ntera ya kilometero hafi 225 uvuye i Addis Ababa. Nta ruhande rudafite aho rubogamiye rwemeje ibyo zavuze.

Leta ya Ethiopia ivuga ko irimo kotswa igitutu kitari ngombwa n'ibihugu byo mu burengerazuba (Uburayi n'Amerika) bikanivanga mu kibazo cyayo, ndetse ivuga ko hari n'umugambi w'ibitangazamakuru mpuzamahanga wo kuyibasira.