Rwanda: Indege zivanye muri Libya izindi mpunzi nyinshi kurushaho “ziritezwe”

Leta y'u Rwanda yemeye kongera umubare rwakiraga w'abimukira n'impunzi baheze muri Libya ukava kuri 500 ukagera kuri 700 ingunga imwe, nk'uko abategetsi babivuga.

Amasezerano yo mu 2019 ya leta, Ubumwe bwa Africa, n'ishami rya ONU ryita ku mpunzi (UNHCR), yatumye hafi 650 muri bo bazanwa mu Rwanda mu ngendo esheshatu z'indege.

Icyo gihe, Perezida Paul Kagame yabwiye inteko rusange y'Umuryango w'Abibumbye ko ibi ari ikimenyetso ko "Afurika ubwayo nayo ni ahantu hava bisubizo", asaba ibindi bihugu bya Africa "kugira ubufatanye nk'ubu".

Ishyaka PS-Imberakuri - igice kitemewe n'amategeko - ryo ryavuze ko izi mpunzi zidakwiye koherezwa mu Rwanda kuko "ubutegetsi buhonyanga uburenganzira bwa muntu harimwo n'ubw'impunzi".

Iyo aba bageze mu Rwanda, bamwe bahava bajya mu bindi bihugu bikize byemera kubaha ubuturo, abandi bagafashwa gusubira mu bihugu byabo, cyangwa bagahabwa uburenganzira bwo kuguma mu Rwanda.

Benshi muri bo baba bifuza kujyanwa mu bihugu bikize.

Itangazo rya minisiteri ifite impunzi mu nshingano rivuga ko "ubu 281 bakomoka muri Eritrea, Sudan, South Sudan, Somalia, Ethiopia, Nigeria, Chad, na Cameroon" ari bo bari mu Rwanda.

Ayo masezerano yongerewe azagera mu kwa 12/2023, kandi ingendo z'indege zibazana byitezwe ko zisubukura, nk'uko iryo tangazo ryo kuwa mbere ribivuga.

Aba bimukira batuzwa mu kigo kiri i Gashora mu karere ka Bugesera aho UNHCR ibaha ibiribwa, amazi, icumbi, uburezi n'ubuvuzi.

UNHCR ivuga ko impunzi n'abimukira bagera ku 3,000 ubu baheze i Tripoli, ko hafi 1,700 muri bo bari mu bigo bafungiyemo kandi "bakeneye kuhavanwa byihutirwa bakajya ahatekanye hanze ya Libya."