US yasabye ko imirwano ihagarara muri Ethiopia
Ahavuye isanamu, Getty Images
Ibiro by'ububanyi n'amahanga bya Leta Zunze Ubumwe z'Amerika bivuga ko bihangayikishijwe bikomeye no kwaguka kw'imirwano hagati y'ingabo za leta ya Ethiopia n'inyeshyamba zo mu karere ka Tigray mu majyaruguru y'igihugu.
Amerika yongeye gusaba inyeshyamba zo mu mutwe wa Tigray People's Liberation Front (TPLF) kuva mu turere twa Amhara na Afar, zigahagarika kwigira imbere mu mijyi ya Dessie na Kombolcha no mu nkengero zayo.
Igisirikare cya Ethiopia cyahakanye ibyari byavuzwe na TPLF ku wa gatandatu ko izi nyeshyamba zari zafashe umujyi wa Dessie.
Uwo mujyi uri ku ntera itageze kuri kilometero 400 mu majyaruguru y'umurwa mukuru Addis Ababa.
Hashize igihe hari imirwano ikaze muri ako gace, ndetse abantu babarirwa mu bihumbi bahungiye mu mujyi wa Dessie.
Imirwano yakajije umurego kuva mu kwezi kwa gatandatu uyu mwaka ubwo inyeshyamba zisubizaga igice kinini cya Tigray harimo n'umurwa mukuru wayo Mekelle.
Ubu zibumbiye mu mutwe wa Tigray Defence Forces (TDF) uhuriwemo na TPLF n'indi mitwe yitwaje intwaro yaho.
Ishyaka rya TPLF ni ryo ryari ku butegetsi mu karere ka Tigray mbere yuko rihirikwa n'ingabo za leta ya Ethiopia mu kwezi kwa cumi na kumwe mu 2020.
Abakuru ba TPLF bashwanye na Minisitiri w'intebe wa Ethiopia Abiy Ahmed ku bijyanye n'amavugurura muri politiki, nubwo kuba TPLF yarafashe ibigo bya gisirikare by'ingabo za leta byo muri Tigray ari yo yabaye imbarutso y'igitero leta yayigabyeho.
Leta ya Ethiopia ivuga ko TPLF ari umutwe w'iterabwoba, ariko TPLF yo ivuga ko ari yo leta y'akarere ka Tigray yemewe n'amategeko.
