Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Taiwan ivuga ko indege zibarirwa muri mirongo za China zinjiye mu karere k'ubwirinzi bwayo
Taiwan ivuga ko zose hamwe indege 39 za gisirikare z'Ubushinwa ku wa gatandatu zagurutse mu karere k'ubwirinzi bwayo bwo mu kirere - ukuvogera kwa mbere kunini gukozwe n'Ubushinwa kugeza ubu.
Minisiteri y'ingabo yavuze ko izo ndege zinjiye mu byiciro bibiri, mu gihe cy'amanywa na nimugoroba.
Bibaye nyuma yuko indege 38, zirimo n'izifite ubushobozi bwo kumisha ibisasu kirimbuzi bya nikleyeri, ku wa gatanu zinjiye mu karere k'ubwirinzi ko kwisobanura uwo uri we (kazwi nka ADIZ mu mpine).
Ubushinwa bufata Taiwan irimo demokarasi nk'intara yitandukanyije na bwo, ariko Taiwan yibona nka leta yigenga.
Taiwan imaze umwaka urenga yinubira ibikorwa byakomeje gukorwa n'igisirikare cy'Ubushinwa kirwanira mu kirere hafi y'icyo kirwa (izinga mu Kirundi).
Ku wa gatandatu, Minisitiri w'intebe wa Taiwan Su Tseng-chang yabwiye abanyamakuru ati: "Ubushinwa bumaze igihe buri mu bushotoranyi bwa gisirikare ku bushake kandi ntawabushotoye, bwangiza amahoro yo mu karere".
Leta y'Ubushinwa - irimo kwizihiza imyaka 72 hashinzwe Repubulika ya Rubanda y'Ubushinwa - nta cyo kugeza ubu yari yatangaza ku mugaragaro.
Ariko mbere yavuze ko ingendo nk'izo z'indege zigamije kurinda ubusugire bwayo kandi ko zinagendereye "umugambi w'ibanga utemewe" uri hagati ya Taiwan n'Amerika.
Mu itangazo, minisiteri y'ingabo ya Taiwan yavuze ko indege 20 z'igisirikare cy'Ubushinwa (kizwi nka PLA) zaje mu masaha yo ku manywa ku wa gatandatu, naho izindi 19 ziza ku mugoroba.
Yavuze ko izo ndege zagurukiye hafi y'itsinda ry'ibirwa rya Pratas Islands.
Akarere k'ubwirinzi bwo mu kirere ni akarere kari hanze y'ubutaka bw'igihugu n'ikirere cy'igihugu - ariko aho indege z'amahanga ziba zigishobora kumenyekanira umwirondoro wazo, no kugenzurwa, mu nyungu z'umutekano w'igihugu.
Ako karere karitangaza kandi urebye kaba kakiri mu kirere mpuzamahanga.
Ibyo bikurikiye ibindi nka byo byabaye ku wa gatanu, ubwo indege z'igisirikare cy'Ubushinwa zagurukiraga hejuru y'amazi ari hagati ya Taiwan na Philippines.
Taiwan yasubije yihutira kohereza indege zayo ndetse inatangiza uburyo bwayo bwo kwirinda ibisasu bya misile.
BBC ntibazwa ibivuye ku zindi mbuga.
Minisiteri y'ingabo ya Taiwan yavuze ko izo ndege z'Ubushinwa zarimo enye zimisha ibisasu zo mu bwoko bwa H-6, zishobora gutwara intwaro kirimbuzi, ndetse n'indege ishobora gusenya ubwato bw'intambara bwo munsi y'inyanja.
Ubushinwa akenshi bukora ubutumwa nk'ubwo bwa gisirikare mu kugaragaza ko butishimiye ibyavuzwe na Taiwan.
Ubushinwa na Taiwan: Iby'ibanze
- Kuki Ubushinwa na Taiwan bifitanye umubano mubi? Ubushinwa na Taiwan byatandukanyijwe mu gihe cy'intambara yo gusubiranamo kw'abaturage yo mu myaka ya 1940, ariko Ubushinwa bushimangira ko icyo kirwa hari igihe kizagera bukacyisubiza, no ku ngufu bibaye ngombwa
- Taiwan itegetswe gute? Iki kirwa gifite itegekonshinga ryacyo, abategetsi batowe binyuze mu buryo bwa demokarasi, ndetse gifite ingabo zigizwe n'abasirikare hafi 300,000
- Ni nde wemera Taiwan?Ibihugu bicyeya gusa ni byo byemera Taiwan. Byinshi ahubwo byemera leta y'Ubushinwa. Amerika nta mubano uzwi ifitanye na Taiwan, ariko ifite itegeko riyisaba guha icyo kirwa ubushobozi bwo kwirinda ubwacyo.
