Jacob Zuma: Minisitiri w'ubutabera avuga ko ashobora kuva muri gereza mu mezi ari imbere yitwaye neza

Jacob Zuma wahoze ari Perezida w'Afurika y'epfo ashobora gufungurwa yitwaye neza amaze gufungwa amezi ane ku gifungo cy'amezi 15 yakatiwe kubera gusuzugura urukiko, nkuko bivugwa na minisitiri w'ubutabera.

Ku wa gatatu nijoro ni bwo Bwana Zuma yishyikirije polisi ngo atangire igifungo cye muri gereza yo mu ntara ya KwaZulu-Natal.

Mu cyumweru gishize yakatiwe icyo gifungo kubera kutitabira iperereza kuri ruswa yo ku gihe cy'ubutegetsi bwe.

Zuma, w'imyaka 79, ahakana kurya ruswa ndetse ntabwo yemeye gukorana n'ubucamanza.

Gufungwa kw'uwahoze ari Perezida ni ikintu kitari cyarigeze kibaho mbere muri Afurika y'epfo.

Ku wa kane, Minisitiri w'ubutabera Ronald Lamola yavuze ko iki ari igihe cyo kwigengesera, atari igihe cyo kwishima, ndetse asezeranya ko Zuma azafatwa cyo kimwe n'izindi mfungwa zose.

Bijyanye n'amategeko agenga amagereza yo muri Afurika y'epfo, "uwahoze ari perezida ashobora kwemererwa gufungurwa by'igihe gito cyangwa gihoraho yitwaye neza amaze gufungwa kimwe cya kane cy'igifungo cye", nkuko Bwana Ramola yabibwiye abanyamakuru.

Zuma afungiye muri gereza ya Estcourt Correctional Centre, iri mu ntera ya kilometero hafi 175 uvuye ku rugo rwe ruri mu cyaro cya Nkandla mu burasirazuba bw'Afurika y'epfo.

Bwana Lamola yavuze ko Zuma azamara ibyumweru bibiri bya mbere by'igifungo cye ashyizwe mu kato, bijyanye n'ingamba zo kwirinda icyorezo cya Covid-19.