Tanzania: Prezida Samia Suluhu yemeje ko hariho igihuhusi ca gatatu ca Corona

Prezida wa Tanzania Samia Suluhu Hassan yemeje ko hari ibimenyetso vy'igihuhusi ca gatatu ca Corona muri ico gihugu.

Avugira mu gisagara ca Dar Es Salaam mu nama yagiranye n'abagize inama y'abasenyeri ba Katolika muri Tanzania (TEC), prezida Samia yavuze ko hari ibimenyetso hagati mu gihugu ko ico kiza kiriho.

Yagize ati:"Nk'uko tubizi ubu kw'isi yose yariho igihuhusi ca gatatu ca Corona, twavuye mu gihuhusi ca mbere muri Tanzania cagiye kirahera buke buke, tuja mu ca kabiri, ubu naho twinjije mu gihuhusi ca gatatu."

Prezida Samia yavuze 'ibimenyetso hagati mu gihugu vyatanguye kwibonekeza, tuza dufise abagwayi bamaze guhura n'iki gihuhusi ca gatatu'.

Yasubiye kwibutsa urugendo yagize ku bitaro vya Mwananyamala mu gisagara ca Dar es Salaam.

"Nimwaba mwibuka umusi nagendera ibitaro vya Mwananyamala, hari icumba umuganga yanyinjijemwo ambwira ko harimwo abagayi bafise ingorane yo guhema, ndamubwira nti dudurirako, ni Covid?

"Aca ambwira ati ego ni Covid, mu gihe abafata amasanamu bari bamaze kwinjira, nca ndabahamagara nti nimuveyo n'ingoga."

Uretse kuvuga ko hari igihuhusi ca gatatu ca Corona, prezida Samia, yasavye ko hoba ukwiyubara kuri ico kiza candukira cane ca corona.