'Tuzaguhoza mu mitima yacu' – Umwe mu bakuru ba M23 yatangaje akababaro batewe n'urupfu

Umunyamabanga w'umutwe wa AFC/M23 yagaragaje ko bari mu gahinda ko kubura umusirikare yise intwari bakunda, kandi ati: "Intwari ntizipfa".

Atavuze izina ry'uwapfuye butumwa yashyize ku rubuga X, Benjamin Mbonimpa yavuze ko yari "umusirikare w'intwari n'umurava".

Mbonimpa abaye uwa mbere mu bakuru ba AFC/M23 ukomoje ku cyunamo barimo mu gihe uyu mutwe utaratangaza kumugaragaro urupfu rwa Lt Col Willy Ngoma wari umuvugizi wabo wa gisirikare.

Urupfu rwa Willy Ngoma, mbere ya 2012 wabaye mu ngabo za FARDC no mu ishyaka rya UDPS riri ku butegetsi mbere yo kujya muri M23, kugeza ubu rwemezwa n'amasoko atandukanye, ko yishwe n'igitero cy'indege za 'drones' z'ingabo za FARDC i Rubaya muri Masisi.

Mu ijoro ryo ku wa kabiri igisirikare cya FARDC cyemeje ko cyishe Willy Ngoma mu gitero cya gisirikare, mbere y'uko gisiba itangazo cyari cyashyize ku rubuga X ryagenzuwe na BBC.

Mbonimpa ni umwe mu bakuru b'umutwe wa AFC/M23 wakunze kuba mu ntumwa nkuru z'uyu mutwe i Luanda muri Angola ndetse no mu biganiro by'i Doha muri Qatar.

Mu butumwa bwe yagize ati: "Tuzaguhoza ku mitima yacu. Udusuhurize intwari zacu n'abasangirangendo aho".

Ibiro ntaramakuru Reuters bivuga ko igitero cyahitanye Willy Ngoma cyiciwemo abantu nibura icyenda ariko gihushaho gato umukuru wa gisirikare w'uwo mutwe, Jenerali (Gen) Sultani Makenga, wahunze nta nkomyi.

Kugeza ubu hari byinshi bitarasobanuka neza ku gitero cy'indege za drone cyarashe ku bakuru b'inyeshyambaza za M23 mu gace ka Rubaya muri Masisi.

Gusa Reuters ivuga ko ubu imirambo yabo icyenda yajyanywe i Goma, umurwa mukuru w'intara ya Kivu ya Ruguru, ariko hari indi mirambo nibura irindwi bitashobotse ko ihakurwa kubera ko yari yahindutse ivu.

Ibitero by'izi ndege za drones byakurikiwe n'imirwano ikomeye yabaye ku wa kabiri no kuwa gatatu mu duce tw'icyaro twegereye Rubaya muri teritwari ya Masisi, imirwano yatumye abantu benshi bahunga ingo zabo, nk'uko sosiyete sivile ya Masisi yabibwiye BBC.

Kuri FARDC byasaga n'aho byaba ari ikosa kwemera ko ari yo yahitanye umuvugizi wa gisirikare wa M23 mu gihe leta ya Kinshasa yari yemeye guhagarika imirwano no kubahiriza agahenge kasabwe na Perezida Joao Laurenco wa Angola.

Bertrand Bisimwa umukuru wungirije w'ihuriro AFC/M23 ndetse n'umuvugizi w'uyu mutwe Lawrence Kanyuka barashinja leta ya DRC kongera kurenga ku gahenge igaba igitero gisesuye ku mirongo yose y'imbere yo ku rugamba no hakurya yayo, bavuga ko ayo ari yo mahitamo Kinshasa yiyemeje.

Kinshasa ihakana kurenga ku gahenge ariko igashimangira ko ubusugire bw'igihugu ari ntavogerwa.

Nyuma y'uko mu byumweru bicye bishize akarere ka Minembwe n'inkengero zako muri Kivu y'Epfo ari ho hari habaye isibaniro ry'imirwano, ubu imbunda zongeye kuvuga ku buryo bukomeye i Masisi.

Iyi mirwano irimo kuba mu gihe imihate ya Amerika, Qatar, n'Ubumwe bwa Afurika yo kugera ku gahenge no guhagarika imirwano kugeza ubu ntacyo irageraho ku rubuga rw'intambara.