Rwanda: Inyeshyamba za FLN 'zateye' i Bweyeye muri Rusizi

Igisirikare cy'u Rwanda kivuga ko ahagana saa tatu z'ijoro ku cyumweru abarwanyi b'umutwe wa FLN bateye agace ka Bweyeye mu karere ka Rusizi baturutse mu ishyamba ku ruhande rw'u Burundi muri komine Mabayi.

Intagazo ry'igisirikare cy'u Rwanda rivuga ko abarwanyi babiri mu bateye bishwe n'ibikoresho bya gisirikare birimo impuzankano ebyiri z'igisirikare cy'u Burundi zigafatwa.

Umuvugizi w'igisirikare cy'u Burundi yabwiye BBC ko ntacyo yahita atangaza ako kanya kuri ayo makuru yari agitangazwa n'uruhande rw'u Rwanda.

Igisirikare cy'u Rwanda kivuga ko abateye basubijwe inyuma bakambuka umugezi wa Ruhwa utandukanya Mabayi mu Burundi na Bweyeye mu Rwanda, "basubira mu ishyamba rya Kibira aho bafite ibirindiro."

Forces de Libération Nationale (FLN) ni umutwe w'inyeshyamba urwanya ubutegetsi bw'u Rwanda, impuzamashyaka MRCD - Ubumwe mu 2018 na 2019 yavuze ko uwo mutwe ari ishami rya gisirikare ryawo.

Paul Rusesabagina wahoze ari umukuru wungirije wa MRCD, n'ababaye abavugizi ba FLN Nsabimana Callixte uzwi nka Sankara na Herman Nsengimana bose bari kuburana mu Rwanda aho baregwa ibyaha by'iterabwoba bishingiye ku bitero FLN yagabye mu Rwanda mu 2018 na 2019.

Mu kwezi kwa 11/2019 muri utu duce twa Mabayi na Bweyeye hagati y'iminsi umunani habaye ibitero bibiri 'bikomeye' byibasiye ibirindiro by'ingabo z'ibihugu byombi biri hafi y'umupaka.

U Rwanda rwashinje u Burundi gufasha umutwe wa FLN naho u Burundi bushinja u Rwanda gufasha RED-Tabara.

Iki gitero kivuzwe n'uruhande rw'u Rwanda mu gihe hashize iminsi hari umuhate uboneka w'abategetsi b'impande zombi wo kongera kubanisha neza ibihugu bakuriye, umubano wabaye mubi kuva mu 2015.