Covid – Philippines: Duterte yasabye imbabazi ku guterwa urukingo rw'Ubushinwa rutaremezwa

Perezida wa Philippines Rodrigo Duterte yasabye ambasade y'Ubushinwa muri icyo gihugu gusubirana doze 1,000 zayo z'urukingo rwa Sinopharm yari yahawe nk'imfashanyo, nyuma yuko anenzwe gufata urukingo rutaremezwa.

Mu gusubiza abamunenga, Bwana Duterte yavuze ko mu gihe kiri imbere Ubushinwa bukwiye kohereza gusa inkingo za Sinovac - urundi rukingo rw'Ubushinwa rukoreshwa muri Philippines.

Urukingo rwa Sinopharm ntabwo ruremezwa muri Philippines.

Byitezwe ko muri iki cyumweru inkingo z'Ubushinwa za Sinopharm na Sinovac zemezwa n'ishami ry'umuryango w'abibumbye ryita ku buzima (OMS/WHO) nk'inkingo za Covid-19.

Bwana Duterte yavuze ko yatewe urukingo rwa Sinopharm agendeye gusa ku ngingo yo kurukoresha mu rwego rw'ubugiraneza, kandi ko abaganga be bwite bari bamugiriye inama yo kwikingiza.

Ibitangazamakuru byo muri Philippines byasubiyemo amagambo ye agira ati: "Ntimukurikize urugero rwanjye".

"[Urukingo] Ni rubi kuko nta bushakashatsi burakorwa, birashoboka ko atari rwiza ku mubiri. Mureke mbe umuntu umwe gusa warufashe".

'Dusabye imbabazi'

Ubwo yasobanuraga ko urukingo rwa Sinopharm rutaremezwa kandi rushobora kuba rwateza ingaruka ku buzima, yongeyeho ati: "Mureke tuzikure hano, kugira ngo ntihagire ikibazo kibaho".

Yanemeye ibyo yanenzwe ko kuba yarakoresheje urwo rukingo rutaremezwa byateza ibyago, ati: "Dusabye imbabazi. Muravugisha ukuri".

Kugeza ubu, inkingo zemewe zonyine ziboneka muri Philippines ni AstraZeneca na Sinovac, kandi zombi zirimo guterwa abakora mu mirimo ituma bahura n'ibyago byinshi byo kwandura, ndetse n'abafite intege nkeya.

Nkuko urubuga rw'amakuru Rappler rwo muri Philippines rubitangaza, ntibizwi impamvu Bwana Duterte atafashe rumwe muri izo nkingo ziboneka muri icyo gihugu zemerewe gukoresha mu buryo bw'ubutabazi bwihuse.

Philippines ni kimwe mu bihugu byo muri Aziya y'amajyepfo ashyira uburasirazuba byashegeshwe bikomeye na Covid-19.

Muri icyo gihugu, abantu barenga miliyoni imwe barayanduye, naho abagera ku 17,800 yarabishe, nkuko bigaragazwa n'imibare yakusanyijwe na Kaminuza ya Johns Hopkins yo muri Amerika.

Nkuko ubushakashatsi bugarukwaho mu bitangazamakuru byo muri Philippines bubivuga, abarenga kimwe cya kabiri cya miliyoni 110 zituye icyo gihugu ntibashaka kwikingiza Covid-19 kubera ubwoba ko izo nkingo zabagiraho ingaruka.

Uku kudashira amakenga inkingo ahanini bisanishwa n'ibyago byatewe n'urukingo rw'indwara ya 'dengue' rwahawe abana mu 2016.

Mu 2020, ubutegetsi bwa Duterte nabwo bwanenzwe bikomeye ubwo abamucungira umutekano bakingirwaga batewe inkingo z'Ubushinwa, habura igihe kirekire ngo inkingo za mbere zigere mu gihugu ku mugaragaro.