Tour du Rwanda: Alan Boileau niwe wegukanye etape ya 2 asize abandi amasegonda

Alan Boileau umufaransa ukinira ikipe ya B&B Hotels yo mu Bufaransa niwe wegukanye agace ka kabiri k'irushanwa rya Tour du Rwanda riri kuba.

Muri aka gace ka Kigali - Huye ka 120,5 Km Boileau yasize abandi akoresheje 03h07'14'', yasize uwamukurikiye Umba Lopez Santiago ho amasegonda atandatu.

Manizabayo Eric wari mu bayoboye igikundi umwanya munini uyu munsi niwe wegukanye igihembo cya 'meilleur grimpeur' cyangwa uwarushije abandi gutwara amanota y'imisozi iterera cyane.

Ku rutonde rusange, uyu munya-Colombia Umba Lopez wo mu ikipe ya Androni yo muri Colombia yahise afata umwenda w'umuhondo arusha mugenzi we Brayan Vergara Sanchez, wo mu ikipe ya Medellin, amasegonda abiri gusa.

Kuri uru rutonde rusange rw'agateganyo, umusore w'umunyarwanda Uhiriwe Byiza Renus ukinira Team Rwanda, ubu ari mu bakinnyi 22 bafatwa nk'aba kabiri kuko bose barushwa na Umba Lopez amasegonda abiri gusa.

Gusa Boileau wabaye uwa mbere uyu munsi ku rutonde rusange ari ku mwanya wa 29 aho arushwa amasegonda 35 n'uwa mbere.

Umunyamakuru wa BBC Yves Bucyana ukurikiranye iri siganwa avuga ko ubu hakiri kare cyane kubona ibishobora kuzaba mu minsi isigaye y'iri siganwa kuko abarushanwa bacyegeranye cyane.

Avuga ko mbere abagiye batsinda aka gace ka Kigali - Huye bakundaga no kwegukana isiganwa muri rusange kuko babaga barusha abandi iminota myinshi, ariko ko ubu begeranye cyane.

Uduce tuzakurikiraho:

Agace ka 3: Nyanza-Gicumbi: 171,6 Km

Agace ka 4: Kigali (Kimironko)-Musanze : 123,9 Km

Agace ka 5 : Nyagatare-Kigali : 149,3 Km

Agace ka 6: Kigali-Kigali: 152,6 Km

Agace ka 7: Kigali-Kigali: 4,5 Km (gusiganwa n'igihe umuntu ku giti cye, ITT)

Agace ka 8: Kigali (Canal Olympia)- Kigali (Canal Olympia): 75, 3 Km