Amatora muri India: Narendra Modi yatsinzwe muri leta y'isibaniro ya West Bengal

Ishyaka rya Minisitiri w'intebe w'Ubuhinde Narendra Modi ryatsinzwe mu matora yabaye muri leta y'ingenzi mu gihe impfu n'abanduye Covid biyongereye mu buryo butari bwarigeze bubaho mbere.

Mu kwiyamamaza, ishyaka BJP ryari rigambiriye cyane kwegukana intsinzi muri leta ya West Bengal, ariko iyi leta yagumanywe mu buryo bworoshye n'uwari usanzwe ayitegeka Mamata Banerjee, unenga bikomeye Bwana Modi.

Bwana Modi amaze igihe ashinjwa kwibanda ku matora aho kwibanda ku guhangana n'icyorezo cya coronavirus.

Amatora yanabaye muri leta za Assam, Tamil Nadu na Kerala, ndetse no muri teritwari (territoire) ya Puducherry.

Ishyaka rya Modi ryagumanye ubutegetsi muri leta ya Assam iri mu majyaruguru ashyira uburasirazuba, ariko rinanirwa kugera ku ntsinzi ikomeye ahandi.

Ku munsi wa 10 wikurikiranya, abanduye ku munsi bakomeje kugera ku 300,000. Kuri uyu wa mbere, abanduye Covid-19 bashya bararenga 360,000, naho abo yishe ni 3,417.

Ku cyumweru, Ubuhinde bwaciye undi muhigo w'abapfuye benshi ku munsi, hapfa abantu 3,689.

Ibitaro birimo gushiranwa n'ibitanda by'abarwayi n'umwuka wa oxygen. Abahinde benshi barimo kwitabaza imbuga nkoranyambaga aho batabaza babaza niba hari uwashobora gufasha ababo.

Ibikorwa byo kwiyamamaza no gutora byavuzweho ko ari byo byatumye habaho ukwiyongera kudasanzwe kwa Covid mu gihugu.

Bwana Modi na minisitiri we w'ubutegetsi bw'igihugu bavugiye amagambo (discours) abarirwa muri za mirongo muri iyo leta ya West Bengal, banashinjwa kwibanda ku matora kurusha kuri iki cyorezo cya Covid-19.

Ni iki cyabaye muri West Bengal?

Mu gihe ibyavuye mu matora hafi ya byose byamaze kubarurwa, ishyaka Trinamool Congress party (TMC) riyobowe na Mamata Banerjee, Minisitiri mukuru wa leta ya West Bengal, ryatsindiye imyanya irenga 200 mu nteko ishingamategeko igizwe n'imyanya 294.

Ibyo byavuye muri ayo matora byitezweho gutuma Madamu Banerjee aba umukuru wa West Bengal ku nshuro ya gatatu. Ni na we Minisitiri mukuru wenyine w'umugore mu Buhinde.

Yishimira intsinzi, yavuze ko West Bengal "yarokoye" (yacunguye) Ubuhinde kubera uko yatoye, anavuga ko guhashya icyorezo cya Covid-19 ari cyo kintu ashyize imbere y'ibindi byose.

Intsinzi yatokojwe no gutakaza umwanya we mu nteko y'umujyi wa Nandigram ukegukanwa n'uwahoze ari umujyanama we akaza no kuva mu ishyaka BJP rya minisitiri w'intebe.

Madamu Banerjee yavuze ko aziyambaza urukiko agahinyuza ibyavuye mu matora muri uwo mujyi, ariko bishobora kumusaba kwiyamamaza nanone kugira ngo akomeze kuba minisitiri mukuru muri uwo mujyi.

Leta ya West Bengal - ituwe n'abaturage miliyoni 90 ikaba ibarizwamo n'umujyi wa Kolkata (Calcutta) - ikurikiranirwa hafi cyane n'abasesengura iby'amatora mu Buhinde.

Ni imwe muri leta nkeya zitarigera na rimwe zitegekwa n'ishyaka BJP rya Bwana Modi rizwiho ibitekerezo by'abo mu bwoko bw'aba-Hindu.

Nubwo ryatsinzwe muri iyo leta, ishyaka BJP ryatsindiye imyanya hafi 80, bituma riba iry'ingenzi ritavuga rumwe n'ubutegetsi bwo muri iyo leta. Mu matora yo mu 2016, muri iyo leta ryari ryatsindiye imyanya itatu gusa.