Daunte Wright: Umupolisi wamurashe i Minnesota ngo 'yaribeshye akoresha imbunda nyayo'

Umukuru wa polisi yatangaje ko kuraswa k'umugabo w'umwirabura kwabaye mu mujyi wa Brooklyn Center muri leta ya Minnesota byabaye by'impanuka.

Daunte Wright w'imyaka 20, yararashwe arapfa mu gihe umupolisi ngo yari aziko akoresheje intwaro yitwa 'Taser' ariko akibeshya akavanayo imbunda nyayo, nk'uko Chief Tim Gannon yabibiwye abanyamakuru.

Taser ni intwaro irekura ingufu nk'iz'amashanyarazi zigaca intege umuntu mu gihe runaka.

Uwo mupolisi byaje gutangazwa ko yitwa Kim Potter, yakoreye polisi ya Brooklyn Center kuva mu myaka 26 ishize.

Urupfu Daunte Write rwateje imyigaragambyo yatumye bahita batangaza umukwabu.

Kuwa mbere nijoro, abantu benshi barenze kuri uwo mukwabu bajya kwigaragambya imbere y'ibiro bikuru bya polisi ya Brooklyn Center. Ababibonye bavuga ko bamwe bateraga ibintu byaka umuriro n'amacupa ku bapolisi nabo bakabasubiza bakoresheje ibyuka biryana mu maso.

Umwuka ni mubi kurushaho hafi y'aho mu mujyi wa Minneapolis aho urubanza rwa Derek Chauvin wahoze ari umupolisi rukomeje ashinjwa kwica George Floyd.

Daunte Wright yahagaritswe ku cyumweru ashinjwa kurenga ku mategeko yo mu muhanda, habaye gushyamirana ubwo yashakaga gusubira mu modoka ye.

Mu kiganiro n'abanyamakuru kuwa mbere mu gitondo, Chief Gannon yerekanye video ngufi ya camera yo ku myambaro y'abapolisi, yerekana Wright ari kwinjira mu modoka ye umupolisi nawe ariho amwambika amapingu iruhande rw'umuhanda.

Nyuma undi mupolisi yumvikana avuga ngo "Taser, Taser, Taser" - uburyo busanzwe bukoreshwa na polisi. Wright aboneka ageze mu modoka akagenda, mu gihe umupolisi yumvikana avuga ngo "ndamurashe".

Kuko yari yakomeretse cyane, Wright ageze imbere gato yahise agonga aragwa.

Chief Gannon ati: "Mbona ko umupolisi yari azi ko azanye 'Taser' ye ariko amurasa isasu rimwe. Ntacyo navuga cyakoroshya umubabaro."

Uyu mupolisi yahise ashyirwa mu kiruhuko.

Muri icyo kiganiro n'abanyamakuru, Mike Elliott ukuriye umujyi wa Brooklyn Center yavuze ko akora ibiri mu bushobozi bwe bwose ngo "Daunte Wright abone ubutabera".

Ati: "Ubu imitima yacu irababaye, turi mu gahinda muri aka kanya. Ibi ntibyari bikwiye kuba muri iki gihe kibi. Ibi bibaye mu gihe mu gihe abantu bose, Amerika yose, mu by'ukuri isi yose iri kureba."

Abigaragambya barakaye, baririmbaga izina rya Daunte Wright bahise bigabiza imihanda inkuru ikimara kumenyaka ku cyumweru nijoro.

Amaduka agera kuri 20 yarasahuwe ndetse ibikorwa byo gusahura byagukira no mu mujyi wa Minneapolis uri hafi, nk'uko ikinyamakuru StarTribune kibivuga.

Abigaragambya kuwa mbere nijoro barenze ku mukwabu washyizweho bahangana na polisi.

Abasirikare bari boherejwe ahari kubera urubanza rwa Derek Chauvin bahise boherezwa i Brooklyn Center.

Imikino ya hockey, basketball na baseball yari kuba kuwa mbere nijoro yahise isubikwa.

Umuryango wa Daunte Wright uvuga iki?

Katie, nyina wa Wright, kuwa mbere nijoro yavuze ko umutima we "wacitsemo ibice igihumbi...", ati: "Ndamukumbuye cyane".

Yongeraho ati: "Yari ubuzima bwanjye, yari umuhungu wanjye, simbasha kubyakira. Ngo habaye kwibeshya? ngo ni impanuka?"

Mbere, yari yavuze uburyo umuhungu we yamuhamagaye ubwo bari bamuhagaritse. Yamubwiye ko ari ukubera "udukoresho tumanitse ku kirahure gituma utwaye imodoka abona inyuma". Avuga ko nyuma yumvise telephone icitse.

Ati: "Hashize umunota umwe, narahamagaye umukobwa w'inshuti ye yari atwaye mu modoka aba ari we witaba, ambwira ko bamurashe...ko umuhungu wanjye aryamye aho nta buzima."