DR Congo: Oxfam yahagaritse abakozi babiri baregwa ihohotera rishingiye ku gitsina
Ahavuye isanamu, Getty Images
Umuryango Oxfam utanga imfashanyo wo mu Bwongereza wahagaritse ku kazi abakozi babiri bawo bakorera muri Repubulika ya Demokarasi ya Congo kubera ibirego byo gusambanya abagore no kubacunaguza.
Oxfam yavuze ko uko guhagarikwa kujyanye n'"iperereza ryakozwe n'abo hanze" y'uwo muryango ryatangiye mu kwezi kwa cumi na kumwe mu mwaka ushize, risuzuma ibyo birego.
Itangazo rya Oxfam rije rikurikira inkuru yo mu kinyamakuru The Times cyo mu Bwongereza aho abakimeneye amabanga bavuze ko "bababajwe n'igihe kirekire byafashe ngo iperereza rirangire".
Mu 2018 Oxfam yibasiwe n'ibibazo nk'ibyo ku bakozi bayo bo muri Haïti.
Icyo gihe Oxfam yashinjwe guhishira ikoreshwa ry'indaya bivugwa ko ryakorwaga na bamwe mu bakozi bayo bari muri icyo gihugu, nyuma y'umutingito w'isi wo mu mwaka wa 2010.
Oxfam yahakanye ivuga ko itabahishiriye, ariko isaba imbabazi ku makosa yakoze mu gucyemura icyo kibazo, inashyiraho akanama kigenga ko kugenzura imikorere ndetse ihagarika gusaba inkunga ya leta y'Ubwongereza.
Uyu muryango hari hashize igihe gito gusa wongeye kwemererwa gusaba inkunga ya leta y'Ubwongereza, nkuko bitangazwa n'ikinyamakuru The Times.
Iki kinyamakuru kivuga ko ibaruwa y'amapaji 10 yashyizweho umukono n'abakozi barenga 20 bakorera Oxfam ubu n'abayikozemo yohererejwe ubuyobozi bukuru bwa Oxfam mu kwezi kwa kabiri uyu mwaka.
Iyo baruwa irega abantu 11 ibirego birimo gukoresha imibonano mpuzabitsina nk'ingurane yo gutanga imfashanyo, gucunaguza, uburiganya n'icyenewabo.
Ivuga ko abatanze ayo makuru "ubuzima bwabo bwashyizwe ku nkeke zo kwicwa". Bimwe mu birego ni ibyo mu mwaka wa 2015.
Iyo baruwa ivuga ko abakozi "batakaje icyizere ku bisezeranywa na Oxfam byo kuryoza amakosa ndetse [batakaje icyizere] no ku mahame Oxfam ivuga ko iharanira".
Mu itangazo, Oxfam ivuga ko akanama kayo kamenyeshejwe mu ntangiriro y'iperereza ibijyanye n'ibirego bishya kandi ko irimo gukomeza guhabwa amakuru yaho imirimo yako igeze.
Oxfam yagize iti: "Dusobanukiwe neza inshingano yacu ku barokotse [ihohoterwa], harimo no kubashyigikira ngo bavuge mu mutekano".
"Turimo gukora cyane ngo dusoze iperereza mu buryo butabera, butekanye kandi butanga umusaruro".
Ku rubuga rwayo rwa internet, Oxfam ivuga ko yatangiye gukorera muri DR Congo mu mwaka wa 1961 kandi ko "ubu itanga amazi meza, ibikorwa by'isukura n'imfashanyo yihutirwa y'ibiribwa ku bantu hafi 700,000 bataye ingo zabo, impunzi n'imiryango y'abakiriye".
