Zanzibar: Visi Perezida wa mbere Seif Sharif Hamad yapfuye ku myaka 77

Perezida wa Zanzibar Dr Hussein Mwinyi yatangaje icyunamo cy'iminsi 7 mu gihugu cyose ku rupfu rwa Visi Perezida wa mbere Maalim Seif Sharif Hamad wapfuye ku myaka 77.

Amabendera azururutswa kugeza hagati mu gihe cy'iki cyunamo, nkuko yabitangaje.

Bwana Hamad yapfuye nyuma gato ya saa tanu z'amanywa zaho kuri uyu wa gatatu mu bitaro bya Muhimbili i Dar es Salaam aho yari amaze hafi ibyumweru bitatu arimo kuvurirwa, nkuko Perezida Mwinyi yabivuze mu itangazo rigufi kuri televiziyo.

Perezida Mwinyi nta mpamvu yavuze y'urupfu rwe, ariko ishyaka ACT Wazalendo rya Bwana Hamad ryatangaje mu mpera y'ukwezi kwa mbere ko bamusanzemo coronavirus we n'umugore we.

Icyo gihe bamwe mu bo bakorana mu biro na bo byatangajwe ko babasanzemo iyi virusi.

Perezida wa Tanzania John Magufuli yatanze ubutumwa bwo kwihanganisha umuryango we n'abaturage ba Zanzibar.

Uburwayi bwe bwamenyekanye hashize iminsi Perezida Magufuli yihanangirije abashinzwe iby'ubuvuzi ko batakwihutira kuzana inkingo za Covid-19 badafite ibyemezo, avuga ko zishobora kugira ingaruka ku buzima.

Bwana Hamad, cyangwa Maalim Seif nkuko yari amenyerewe cyane muri Zanzibar, yabaye umutegetsi wa mbere muri Tanzania wo ku rwego rwo hejuru cyane utangaje ku mugaragaro ko bamusanzemo Covid-19.

Kuva mu mpera y'ukwezi kwa kane mu 2020, Tanzania yahagaritse gutangaza amakuru ajyanye na Covid-19, mu kwezi kwa gatandatu k'uwo mwaka Perezida Magufuli avuga ko itakiharangwa.

Mu bihe bya vuba bishize ariko, Kiliziya Gatolika yo muri Tanzania yavuze ko hari ibimenyetso ko Covid-19 yongeye kwiyongera mu gihugu, ishingiye ku bwinshi bwa misa zo gusabira abapfuye isigaye isoma ku munsi.

Bwana Hamad yari umuntu ukomeye cyane muri politiki y'abatavuga rumwe na leta muri Zanzibar no muri Tanzania muri rusange.

Kugeza ubwo yapfaga, yari Visi Perezida wa mbere muri leta y'ubumwe bw'igihugu yavuye mu matora rusange yo mu kwezi kwa 10 mu mwaka ushize.