Kenya: Abasenateri bemeje iyeguzwa rya Mike Sonko wari umukuru wa Nairobi
Ahavuye isanamu, Getty Images
Guverineri Mike Sonko Mbuvi w'akerere k'umurwa mukuru Nairobi wa Kenya, yakuwe ku mirimo ye nyuma yuko sena yemeje iyeguzwa rye ryakozwe n'inteko y'ako karere.
Abasenateri basanze Bwana Sonko ahamwa n'ibyaha bine birimo guhonyora itegekonshinga, gukoresha nabi ububasha bwe, imyitwarire mibi n'ibindi byaha bihanwa n'amategeko ya Kenya.
Bimwe mu birego yarezwe n'inteko y'akarere ka Nairobi, ni birego byo gukoresha amafaranga ya leta mu kuriha urugendo rwerekeza i New York rwakozwe n'umukobwa we mu mwaka wa 2018 ndetse no gukoresha nabi amafaranga y'ishuri agenewe abanyeshuri batishoboye b'i Nairobi.
Bwana Sonko, uzwiho kwambara ibihenze birimo n'ibikomo bikoze muri zahabu, ahakana ibyo aregwa, akavuga ko yahohotewe n'ibico by'abategetsi bamunzwe na ruswa b'i Nairobi, avuga ko barimo kumurwanya kubera kugerageza guhagarika isahurwa ry'umutungo wa rubanda.
Uyu Guverineri wegujwe, asanzwe atavugwaho rumwe. Abakuru ba gereza muri Kenya baherutse kumushinja ko mu myaka 20 ishize yatorotse gereza irinzwe cyane.
Bwana Sonko, mu kiganiro cyanyuze kuri televiziyo mu buryo bwa 'live', yemeye ko koko yatorotse gereza.
Mu kwezi kwa cumi na kabiri mu mwaka ushize, yari yatawe muri yombi acyekwaho ruswa.
Bwana Sonko yari yatowe mu mwaka wa 2017, ku itike y'ishyaka Jubilee Party rya Perezida Uhuru Kenyatta.
Guverineri wa kabiri wegujwe
Ariko bombi ubu ntibakivuga rumwe, bituma Perezida Kenyatta ashyirishaho uburyo bwatumye imirimo ikomeye y'akarere ka Nairobi igenzurwa na leta.
Bwana Kenyatta yanashyizeho umusirikare w'ipeti rya jenerali, ukiri mu ngabo, ngo ayobore akarere ka Nairobi, bituma Bwana Sonko asigara nta bubasha afite.
Bwana Sonko yari yitabiriye umuhango wo guhererekanya ububasha n'uwo jenerali ku bijyanye n'imirimo y'akarere. Nyuma yavuze ko yari yasinze ubwo yashyiraga umukono ku nyandiko zo guhererekanya ububasha.
Abaturage ba Nairobi ubu bazitabira amatora mu gihe kitarenze iminsi 60 iri imbere, kuko Bwana Sonko nta mwungiriza yari afite.
Abaye Guverineri wa kabiri wegujwe nyuma ya Ferdinand Waititu wegujwe mu kwezi kwa mbere ku kuba Guverineri w'akarere ka Kiambu, na we ashinjwa ibyaha nk'ibyo. Bwana Waititu yahakanye avuga ko nta kibi yakoze.
