FBI ishinja umugabo wo muri Kenya gukoreshwa na al-Shabab ngo agabe igitero cy'indege muri US

Umugabo wo muri Kenya wize muri Philippines ibijyanye no gutwara indege arashinjwa gucura umugambi wo gushimuta indege ashaka kuyijyana ngo ayigongeshe inyubako ndende yo mu mujyi wo muri Amerika.

Cholo Abdi Abdullah yatawe muri yombi muri Philippines mu mwaka ushize aregwa ibijyanye no gutunga intwaro. Abashinjacyaha ntabwo bavuze izina ry'umujyi bivugwa ko yashakaga kugabamo icyo gitero.

Nkuko ikigo FBI cy'ubutasi bw'imbere muri Amerika kibivuga, ngo yahabwaga amabwiriza n'umutegetsi ukomeye wo mu mutwe w'iterabwoba wa al-Shabab wo muri Somalia.

Yahakanye ibyo aregwa byose, nkuko bitangazwa n'ibiro ntaramakuru Reuters.

Umwunganizi we mu mategeko yemeranyijwe n'umucamanza ku wa gatatu ko Bwana Abdullah akwiye kuguma afunze hategerejwe ko urubanza rwe rutangira mu kwezi kwa mbere.

Nkuko bikubiye mu nyandiko y'ibirego ya FBI yatangajwe ku wa gatatu, Bwana Abdullah, w'imyaka 30, ku wa kabiri yoherejwe muri Amerika avanywe muri Philippines, kugira ngo aburanishwe ku rutonde rurerure rw'ibyaha by'iterabwoba.

Ibyo byaha aregwa birimo no gushimuta indege ndetse no kuba umufatanyacyaha mu mugambi wo kwica Abanyamerika.

Abategetsi bavuga ko Bwana Abdullah mu mwaka wa 2016 yiyandikishije mu ishuri ryo gutwara indege ryo muri Philippines, nyuma akaza kurangiza afite impamyabumenyi zihagije zo gutuma abona uruhushya rwo gutwara indege.

Bavuga ko yari afite "intego yo kubona amahugurwa yatuma akora igitero nk'icyo ku itariki ya 11 y'ukwezi kwa cyenda" mu mwaka 2001 cyibasiye inyubako zimwe zo muri Amerika.

Umutwe wa al-Qaeda ni wo wayoboye ibyo bitero byo mu mwaka wa 2001, ubwo indege zitwara abagenzi zashimutwaga zikagongeshwa inyubako zo muri Amerika, zikica abantu bagera hafi ku 3,000.

Al-Shabab ni ishami rya al-Qaeda, ikaba yarakoze ibitero byinshi by'iterabwoba muri Afurika y'uburasirazuba.

Abakora iperereza bavuga iki?

Bavuga ko ubwo yigaga kuba umupilote, Bwana Abdullah yakoze ubushakashatsi ku buryo bwo kwinjira mu cyumba cy'abapilote batwara indege zisanzwe zitwara abagenzi.

Ndetse no "ku makuru ku nyubako ndende cyane kurusha izindi mu mujyi ukomeye wo muri Amerika", hamwe n'uko umuntu yabona uruhushya (visa) rwo kujya muri Amerika.

Bivugwa ko uwo mugambi wari ujyanye n'igitero cya al-Shabab cyiswe "Jerusalem Will Never be Judaized" (Yeruzalemu nta na rimwe izaba iy'Abayahudi), cyari icyo kwihimura ku butegetsi bwa Bwana Trump nyuma y'icyemezo cyo kwimura ambasade y'Amerika muri Israel bukayishyira mu mujyi wa Yeruzalemu.

William F Sweeney Jr, umuyobozi wungirije wa FBI wakurikiranye iyo dosiye, avuga ko nyuma y'imyaka hafi 20 habaye ibitero by'iterabwoba muri Amerika, "hakiri abafite umuhate wo gukora ibitero by'iterabwoba ku baturage b'Amerika".

Uwo muyobozi wungirije wa FBI avuga ko Bwana Abdullah aregwa kuba umwe mu bantu nk'abo.

Abakora iperereza bavuga ko Bwana Abdullah yahabwaga amabwiriza n'umwe mu bakuru ba al-Shabab, wayoboye igitero cy'iterabwoba kuri hoteli y'i Nairobi mu mwaka wa 2019.