Nigeria: Abigaragambya 'bishwe barashwe' i Lagos

Amakuru avuga ko bamwe mu bitabiriye imyigaragambyo yo kwamagana ibikorwa by'urugomo bya polisi ya Nigeria bishwe barashwe cyangwa bagakomereka mu murwa mukuru w'ubucuruzi wa Lagos.

Ababibonye bavuze ko abantu bagera kuri 12 biciwe muri iyo myigaragambyo naho abandi benshi barakomereka, nyuma yuko abasirikare babarasheho ejo ku wa kabiri nimugoroba.

Umuryango uharanira uburenganzira bwa muntu Amnesty International wavuze ko wabonye "amakuru yo kwizerwa" ajyanye n'izo mpfu.

Igisirikare cya Nigeria cyavuze ko ayo ari "amakuru y'ibinyoma" (fake news). Perezida Muhammadu Buhari yasabye ko habaho "ubwumvikane n'ituze".

I Lagos no mu tundi turere hashyizweho igihe cy'umukwabu w'amasaha 24, bitatangajwe igihe uzarangirira.

Umunyamakuru wa BBC Nduka Orjinmo uri muri Nigeria avuga ko kuri uyu wa gatatu abigaragambya bacye barenze kuri ayo mategeko y'umukwabu bateranira mu gace ka Lekki i Lagos ari naho ibyo byabereye.

Iyi myigaragambyo ni iyo kwamagana umutwe kabuhariwe wa polisi wo kurwanya ubujura (SARS), ubu wamaze kuvanwaho. Imaze hafi ibyumweru bibiri.

Avuga ku iraswa ry'abigaragambya i Lagos, Hillary Clinton wahoze ari umunyamabanga wa leta y'Amerika yasabye Perezida Buhari wa Nigeria ndetse n'igisirikare "kureka kwica urubyiruko rw'abigaragambya bamagana SARS".

Joe Biden wahoze ari visi perezida w'Amerika ubu akaba arimo kwiyamamariza kuba perezida ahatanye na Perezida Donald Trump mu matora yo mu kwezi kwa 11, yasabye abategetsi ba Nigeria kureka "guhutazanya urugomo abigaragambya".

Mu itangazo yasohoye, Bwana Biden yagize ati:

"Amerika igomba kwifatanya n'abanya-Nigeria barimo kwigaragambya mu mahoro basaba ko hakorwa ivugurura muri polisi banasaba ko ruswa irangira mu butegetsi bwabo bwa demokarasi".

Odion Jude Ighalo, umukinnyi wa Manchetser United ukomoka muri Nigeria, yashinje leta ya Nigeria kwica abaturage bayo.

Mu butumwa bwa videwo yatangaje kuri Twitter, yagize ati: "Ntewe isoni n'iyi leta".

Perezida Buhari yasheshe umutwe SARS ku itariki ya 11 y'uku kwezi kwa 10.

Washinjwaga ibirimo nko gufunga binyuranyije n'amategeko no kurasa abantu.

Ariko abigaragambya basabye ko hakorwa izindi mpinduka mu nzego z'umutekano ndetse no kuvugurura uburyo iki gihugu gitegetswe.

Guverineri Babajide Sanwo-Olu wa leta ya Lagos yavuze ko abagizi ba nabi bigaruriye iyi myigaragambyo bakaba ubu ari bo barimo kuyikora.