Stella Immanuel – umuganga wemeza umuti utemewe Trump yemera

Stella Immanuel, umuganga wateje impaka ashimangira imbaraga z'umuti abakuriye iby'ubuzima bemeje ko utavura Covid-19, ntabwo ari mushya mu ngingo zitavugwaho rumwe.

Facebook na Twitter byavanyeho videwo yakwiriye henshi cyane abonekamo, izi mbuga zivuga ko ayo mashusho anyuranyije n'amabwiriza abuza impuha - ariko yari yamaze gukwizwa kandi na Perezida Donald Trump n'umwe mu bahungu be.

Perezida wa Amerika yatangaje ko yabonye ibivugwa n'uyu muganga - wavukiye muri Cameroun ariko ubu ukorera mu mujyi wa Houston, Texas - ari ibintu "byiza cyane".

Ku wa kabiri, Bwana Trump yagize ati: "Yavuze ko yavuye abantu amagana akoresheje uwo muti, nibaza ko ijwi rye ari ingenzi ariko nta kintu muzi ho".

Dr Immanuel, usanzwe kandi ari n'umupasitoro, yavuze biriya ari imbere y'Urukiko rw'Ikirenga rwa Amerika i Washington, videwo ye yatangajwe bwa mbere ku wa mbere n'urubuga rwitwa Breitbart rubogamiye kubo mu ishyaka ry'abarepubulikani.

Yari kumwe n'abandi baganga bari mu ishyirahamwe ryitwa 'America's Frontline Doctors', aho yavuze ko Abanyamerika "bari kwimwa umuti uvura Covid-19".

Yasubiyemo kenshi ati: "Nta muntu ukwiye kurwara. Iyi virusi ifite umuti - witwa hydroxychloroquine, nawuvuje abarwayi barenga 350 kandi nta n'umwe wapfuye".

Mu ntangiriro hakozwe ubushakashatsi hizewe ko uyu muti ushobora kuba uvura iki cyorezo, ariko ubwakozwe ku bantu benshi bwerekanye ko utafatwa nk'umuti w'iki cyorezo.

Ishami ry'umuryango w'abibumbye rishinzwe ubuzima ku isi (WHO/OMS) ryahagaritse ikoreshwa ryawo rivuga ko utagabanya urugero rw'abicwa na coronavirus.

Mu kwezi gushize, ikigo gishinzwe iby'imiti n'ibiribwa cya Amerika cyaburiye ikoreshwa ry'uyu muti ku barwaye coronavirus, kuko habonetse ibimenyetso ko "utera ibibazo by'umutima" n'ubundi burwayi.

Dr Anthony Fauci, uri mu bagize akanama gashinzwe kurwanya iki cyorezo ko mu biro bya perezida wa Amerika, yashimangiye ibi bitekerezo.

Ejo ku wa gatatu yabwiye BBC ati: "Tuzi neza ko buri bushakashatsi bwiza bwose bwakozwe - bwiza ndavuga bwagutse kandi bufitiwe icyizere - bwerekanye ko hydroxychloroquine itavura Covid-19".

Gusa Dr Immanuel we yashimangiye ko gufata hydroxychloroquine ntacyo bitwaye ku buzima kuko abantu benshi mu gihugu avukamo cya Cameroun bayifata, kubera malaria.

Yanashimangiye ko abategetsi benshi n'abandi bashinzwe ubuzima muri Amerika - barimo n'uyu Dr Fauci - bafata uwo muti birinda Covid-19.

Atega ko niba bamunyomoza bamuha inkari zabo akazipima atazisangamo hydroxychloroquine nawe akemera ko utavura nk'uko bo babivuga.

Amarozi n'amadayimoni

Dr Immanuel w'imyaka 55, yize ubuvuzi muri kaminuza ya Calabar muri Nigeria - afite icyangombwa cyo kuvura muri Amerika nk'uko biboneka ku rubuga rw'abaganga bakorera muri leta ya Texas.

Ni n'umupasitoro washinze ikitwa 'Fire Power Ministries' mu mujyi wa Houston, urubuga akoresha mu kuvuga ibyo yemera mu mwuga w'ubuvuzi no kwemera Imana.

Inyigisho ze ziboneka no kuri konti ye ya YouTube yashinze mu 2009.

Mu myaka itanu ishize, yavuze ko utunyangingo (DNA) tw'ibiremwa bitazwi neza bita 'alien' turi gukoreshwa mu buvuzi, ko kandi siyansi iri gukora urukingo rwo kubuza abantu gusenga.

Bimwe mu bindi yatangaje harimo gushinja amarozi n'amadayimoni mu gihe umuntu afite uburwayi - ibi ni ibikunze kwemezwa na bamwe mu bavugabutumwa - we yemeza ko amadayimoni asambana n'abantu mu isi y'inzozi.

Mu kigisho yatanze mu 2013 yagize ati: "Yihindura umugore maze akaryamana n'umugabo agatwara intanga ze...ubundi akihindura umugabo akaryamana n'umugore agatera izo ntanga hakavuka andi madayimoni".

Ikindi gihe, Dr Immanuel yanenze gushyingira abahuje igitsina, avuga ko biganisha aho abantu bakuru bazajya bashyingiranwa n'abana, nk'uko ikinyamakuru Daily Beast kibivuga.

Uyu muganga avuga ko asengera abantu ngo abakize imivumo ya karande, avuga ko iba ikomoka ku musekuru umwe ikagenda ihererekanywa biciye muri nyababyeyi nk'uko bigaragara ku rubuga rwe bwite.

'Yesu azafunga Facebook'

Muri videwo yashyize kuri Twitter ku wa kabiri, yasabye abarwayi avuga ko yavuye Covid-19 kwigaragaza.

Ati: "Nimutavuga bazavuga ko tubeshya," abasaba gukoresha 'hashtag' mu gihe bashyiraho videwo zabo.

Ibi yashyize kuri Twitter byakwirakwijwe (retweets) n'abarenga 27,000.

Ku wa kabiri, Facebook imaze gukuraho videwo ya 'America's Frontline Doctors', Dr Immanuel yahise avuga ko Yesu Kristo azashwanyaguza ububiko bwose bw'amakuru y'uru rubuga niba videwo ze zidasubijweho.

Facebook ntacyo yabitangajeho, nta kibazo iravuga ko yaba yagize muri serivisi zayo.

'America's Frontline Doctors' ni bande?

Ni itsinda ry'abaganga bahinyura ibyemejwe n'abakora siyansi ku cyorezo cya Covid-19.

Igikorwa cyabo cyo ku wa mbere cyashyigikiwe n'abitwa 'Tea Party Patriots', ishyirahamwe ry'abatsimbaraye ku mahame ya kera rigamije ko Perezida Trump yongera agatorwa.

Aba baganga bemera ko udupfukamunwa cyangwa kugumisha abantu mu ngo (lockdown) bidakenewe mu kurwanya coronavirus.

Mu kwezi kwa gatanu, uwashinze iri tsinda, Simone Gold, yateguye ibaruwa igenewe Bwana Trump imusaba guhagarika 'lockdown'.

Ku wa mbere, Ralph Norman, umudepite w'umurepubulikani, yari ahagararanye n'iri tsinda ry'abaganga ubwo batangaga ikiganiro ku banyamakuru.

Impaka zikomeje kuba nyinshi ku muti wa hydroxychloroquine mu Banyamerika n'abandi bumvise iby'aba baganga na Dr Immanuel.

Bamwe bavuga ko bashaka gukoresha uwo muti mu gushyigikira imigambi ya politiki ya Trump, abandi bakavuga ko abamurwanya bashaka guhisha ubushobozi bwawo kuri iki cyorezo.