Zimbabwe: Impinja zirindwi zapfuye mu ijoro rimwe mu gihe abaganga bari kwigaragambya

Abana barindwi b'impinja bapfuye mu ijoro rimwe muri iki cyumweru mu gice kivurirwamo abagore cy'ibitaro bikuru by'i Harare kubera ibibazo by'abakozi bishingiye kuri Covid-19.

Mu ijoro ryo kuwa mbere, muri ibi bitaro byo mu murwa mukuru, ababyeyi umunani bari bakeneye kubyazwa byihutirwa babazwe.

Barindwi muri bo abana babo babakuye mu nda bapfuye nk'uko bamwe mu baganga babyemeza.

Abaganga babiri batifuje gutangazwa amazina, bazi neza ibyabaye hano, bemereye BBC ko aba babyeyi bakuwemo abana bapfuye kuko ababyaza bari mu myigaragambyo mu gihe ibi bitaro byuzuriranye.

Aba baganga bavuga ko aba babyeyi bamaze iminsi kwa muganga nta ubafasha mu gihe abaganga bari mu myigaragambyo.

Umuganga witwa Dr Peter Magombeyi niwe watangaje bwa mbere kuri Twitter impfu z'aba bana agira ati: "Twambuwe ahazaza hacu, harimo abana bari bataravuka. Rwose nimurekere aho kudusahura".

Umwe muri aba baganga yavuze ko "habayeho kuza gufasha aba babyeyi bitinze cyane". Ko abana bamwe bapfiriye mu matako y'ababyeyi babo igihe cyo kuvuka kigeze.

Urwego rw'ubuzima muri Zimbabwe ruherutse gukubitika kubera ubujura bwabayeho mu kugura ibikoresho byo kwirinda coronavirus.

Bivugwa ko amasezerano ya miliyoni z'amadorari yo kugura ibbyo bikoresho byo mu buvuzi yabayemo ubujura, minisitiri w'ubuzima aherutse kwirukanwa kubera ibi birego.

Ubu imiti ni micyeya n'ibikoresho by'abaganga byo kwirinda (PPE) ni bicyeya, mu gihe abaganga nabo bugarijwe n'akazi kenshi.

Ibitaro bitoya byigenga (clinics) byinshi muri Harare byarafunze kubera ubwoba bwa Covid-19 kuko nta bikoresho byo kuyirinda bifite, ibindi kubera ibibazo bishingiye ku bukungu.

Ibi byatumye abagore batwite buzura mu bitaro bikuru bya leta biri i Harare, ubu bitagishoboye kubakira bose.

Umuganga umwe yavuze ko ari ibihe bigoye cyane barimo. Undi avuga ko impfu za bariya bana kuwa mbere atari ikintu gishya, ahubwo ari ibintu biba buri gihe.